«Qazaqstan Respýblıkasynyń Prezıdenti Qasym-Jomart Toqaevtyń tapsyrmasyna sáıkes, Qazaqstan Úkimeti joıqyn jer silkinisinen zardap shekken Sırııa halqyna gýmanıtarlyq kómek jóneltedi. Azyq-túlik qaýipsizdigi jónindegi Islam uıymy arqyly kómek kórsetiledi», dedi Aıbek Smadııarov.
Onyń aıtýynsha, bul maqsattarǵa respýblıkalyq bıýdjetten 160 mıllıon teńgeden astam qarjy bólindi.
«Jalpy salmaǵy 50 tonnany quraıtyn azyq-túlik, jyly kıim, shatyr jáne tósek-oryn túrindegi kómek Sırııa Arab Respýblıkasynyń aýmaǵyna arnaıy ushaqpen jetkiziledi. Birinshi ushaq búgin Almatydan Sırııaǵa ushyp ketti», dedi Aıbek Smadııarov.
Azyq-túlik qaýipsizdigi jónindegi Islam uıymynyń basshylyǵy Qazaqstannyń Lıvandaǵy elshiligi men Sırııadaǵy Qazaqstannyń konsýldyǵynyń kómegimen gýmanıtarlyq júkti Sırııanyń Aleppo qalasyndaǵy ýákiletti ókilderine jeke ózi tapsyrady.
Buǵan deıin Qazaqstan jer silkinisinen zardap shekken Sırııaǵa 50 tonna gýmanıtarlyq kómek jibergeni týraly habarlaǵan edik. Memleket basshysy Qasym-Jomart Toqaev Úkimetke Sırııaǵa gýmanıtarlyq kómek kórsetýdi tapsyrdy.
Eske salaıyq, 6 aqpanda Túrkııanyń ońtústik-shyǵysyndaǵy Kahramanmaras provınsııasynda magnıtýdasy 7,7 bolatyn jer silkinisi boldy.
