Jobanyń tehnologııalyq shemasyna sáıkes, gaz qubyrynyń 2-shi jelisiniń jalpy uzyndyǵy 308 km, ótkizý qabileti jylyna 5,8 mlrd m3 quraıdy. Jumystardy júrgizý kestesine sáıkes qurylysty aıaqtaý jáne paıdalanýǵa berý 2023 jyldyń jeltoqsanyna josparlanyp otyr. «Búgingi tańda Mańǵystaý oblysynda elimizdiń ishki naryǵy boıynsha tabıǵı gazdyń eń joǵary tutynylý kórsetkishi baıqalady, sondyqtan ekinshi jelini salý mańyzdy áleýmettik-ekonomıkalyq mánge ıe, sondaı – aq óńirdiń energetıkalyq qaýipsizdigin kúsheıtedi», dedi Sanjar Jarkeshov.
QazaqGaz basshysynyń aıtýynsha, megajobany iske asyrý Mańǵystaý oblysynyń eldi mekenderin, halyqty, áleýmettik obektilerdi jáne óńirdiń ónerkásiptik kásiporyndaryn jylýmen-sýmen jabdyqtaýǵa, sondaı-aq shtattan tys jaǵdaılardyń aldyn alýǵa jáne óńir halqyna strategııalyq mańyzdy qyzmetter retinde gaz berýdi toqtatý qaýpin boldyrmaýǵa, jumysy tikeleı táýeldi iri kásiporyndardy turaqty gazben jabdyqtaýdy qamtamasyz etýge múmkindik beredi. Aıta keteıik, Memleket basshysy Mańǵystaý óńiriniń gaz tasymaldaý júıesin jańǵyrtý jáne elimizdiń energetıkalyq qaýipsizdigin kúsheıtý qajet degen edi.
Saltanatty is-sharada sóz sóılegen oblys ákimi Nurlan Noǵaev bul jobany iske asyrý óńirdiń áleýmettik-ekonomıkalyq damýyna jaǵymdy mýltıplıkatıvtik áser etetinin atap ótti.
«Memleket basshysy Qasym-Jomart Toqaevtyń tapsyrmasyn oryndaý aıasynda Mańǵystaý oblysyn turaqty túrde gazben qamtamasyz etý úshin QazaqGaz ulttyq kompanııasy Beıneý-Jańaózen magıstraldyq gaz qubyrynyń ekinshi jelisin salýdy bastady. Bul jobany iske asyrý shaǵyn jáne orta bıznesti damytýǵa, jańa jumys oryndaryn qurýǵa, sondaı - aq halyqtyń ómir súrý sapasyn arttyrýǵa yqpal etedi», dedi oblys ákimi Nurlan Noǵaev.
Sonymen qatar, «QazaqGaz» UK» AQ basqarma tóraǵasy Sanjar Jarkeshov Mańǵystaý oblysyna jumys sapary aıasynda «Jańaózen-Jetibaı-Aqtaý» gaz tasymaldaý júıesine júrgizilip jatqan kúrdeli jóndeý jumystarynyń barysymen tanysty. Bul júıe úsh jeliden turady jáne Mańǵystaý oblysynyń, Aqtaý qalasynyń jáne oblystyń MAEK sııaqty iri ónerkásiptik kásiporyndarynyń tabıǵı gazǵa degen qajettiligin jabatyn «Okarem-Beıneý» magıstraldyq gaz qubyrynyń jalǵasy bolyp esepteledi.
