Oqý-aǵartý mınıstrligi Balalardyń quqyǵyn qorǵaý komıtetiniń málimetinshe, Petropavl qalasyndaǵy mektepte bolǵan oqıǵaǵa baılanysty arnaıy komıssııa qurylǵan.
«Komıssııa quramyna balalardyń quqyqtaryn qorǵaý komıteti, bilim salasynda sapany qamtamasyz etý departamenti, Soltústik Qazaqstan oblysy bilim basqarmasynyń ókilderi bar. Aıta keteıik, mektepte qaýipsizdikti qamtamasyz etý úshin ornatylǵan beınebaqylaý kameralary men dabyl túımesi jumys isteıdi. Qazirgi ýaqytta oqıǵanyń mán-jaıy anyqtalyp jatyr. Sonymen qatar oblystyq, respýblıkalyq mańyzy bar qalalardyń bilim basqarmalaryna elimizdiń barlyq jalpy bilim beretin mektepterinde qaýipsizdikti tekserý jumysy tapsyryldy», delingen habarlamada.
Aıta keteıik, búgin Petropavlda 9-synyp oqýshysy mektepke balta men pyshaq alyp kelip, birneshe oqýshyny jaraqattaǵan edi. Qazir eki jasóspirim basy men bileginen pyshaq jaraqatyn alyp, balalar aýrýhanasynda jatyr. Úshinshisi oqıǵa ornynda medısınalyq kómek alǵan. Mektepte tergeý toby jumys istep jatyr.
Soltústik Qazaqstan oblysynyń polısııa departamenti mektep oqýshylaryna shabýyl jasady degen kúdikpen jasóspirimniń ustalǵanyn habarlady.
