Balamyzdy sport seksııasyna bergende qymbat sport túrlerinen at-tonymyzdy ala qashatynymyz bar. Ásirese, qysqy sport túrleriniń mańyna jolamaımyz. Balanyń bolashaǵyn áleýmettik-turmystyq ahýaldyń «mysy» basyp ketedi. Sóıtip, toǵyzqumalaq, kúres sııaqty qaltaǵa salmaq túsirmeıtin sportqa jazdyramyz. Keıin «úlken tennıs, hokkeıde nege qazaqtyń balalary joq» dep sportqa jaýapty organdardy synap álekpiz. Búginde hokkeı seksııasyndaǵy 4-5 jastaǵy balanyń bir jabdyq kıim-kesheginiń baǵasy 300 myń teńgeniń ár jaq ber jaǵy. Bala ósken saıyn onyń da baǵasy qymbattaı túsetin kórinedi. Jyl saıyn azyq-túliktiń ǵana emes, sporttyq quraldardyń da baǵasy aspandap jatatyny belgili. Muny qaperine alǵan ata-ana «bizdiń tuqymymyzda hokkeı oınaǵan eshkim joq» dep ózin aqtap alýǵa tyrysyp, jurttyń balalarynan qalmasyn dep kúres seksııasyna beredi.
Árıne, seksııaǵa jazylǵan balanyń bári birdeı kásipqoı sportshy bolyp ketpeıdi. Biraq, úlken sportqa degen jol sol jaqtan bastalatynyn esten shyǵarmaǵan jón. Balanyń bolashaǵy úshin qarajatty únemdemegende múmkin sol baladan Olımpıada, álem chempıony shyǵar ma edi? Hokkeı demekshi, bos ýaqytta áriptesterimizben birge «Barys-Arena» muz aıdynyna baryp, «Barys» hokkeı klýbynyń oıynyn tamashalaýdy ádetke aınaldyrǵanbyz. Ańǵarǵanymyz, kezdesýdi tamashalaýǵa kelgen jankúıerlerdiń kóbi ózge ult ókilderi. Aıtpaǵymyz ol emes. Olar jalǵyz kelmeı, kishkentaı balalaryn birge ertip júredi. Bul da balany sportqa baýlýdyń, salamatty ómirge tárbıeleýdiń joly emeı, nemene?!
Deni saý urpaq – ulttyń eń qymbat baılyǵy. Bul rette Memleket basshysy Qasym-Jomart Toqaev óziniń alǵashqy Joldaýynda buqaralyq sportty damytý máselesine nazar aýdarǵan bolatyn. «Ult densaýlyǵyn bekemdeý máselesi de óte ózekti. Barlyq jas sanaty arasynda buqaralyq sport túrlerin nasıhattaı berý kerek. Balalar úshin sporttyq ınfraqurylymnyń barynsha qoljetimdi bolýyn qamtamasyz etý kerek. Buqaralyq sportty damytý – pıramıdaǵa aınalýy qajet. Onyń basyna chempıondar shyqsa, onyń negizinde biz saý ári sanaly urpaqty, myqty ultty qalyptastyramyz», dep buqaralyq sportty damytýǵa arnalǵan keshendi baǵdarlama qabyldaý kerektigin aıtqan bolatyn.
Prezıdenttiń osy tapsyrmasyn oryndaý maqsatynda «Deneshynyqtyrý men buqaralyq sportty damytý jónindegi 2020-2025 jyldarǵa arnalǵan keshendi jospar» ázirlenip, ol Úkimettiń qaýlysymen bekitilgeni málim. Osy josparǵa sáıkes, memleket-jekemenshik áriptestigi aıasynda balalar men jasóspirimderge arnalǵan sport seksııalaryna jan basyna qarjylandyrý júıesi engizildi. Sport keshenin ashyp, memlekettik sporttyq tapsyrys aıasynda jumys istegisi kelgen azamat arnaıy portaly arqyly ótinish beredi. Jergilikti ýákiletti organdar qyzmet kórsetýshiniń talapqa sáıkestigin tekserip, portalǵa engizedi. О́z kezeginde ata-analar da balasyn tegin óner úıirmesi nemese sport seksııasyna jazdyrǵysy kelse, atalǵan portal arqyly ótinish berýine bolady. Portalǵa tirkelip, óz shaǵyn aýdanyndaǵy sport seksııasyn jáne ondaǵy sport túrin ózi tańdap alady. Bul jańashyldyq buqaralyq sporttyń damýyna jańa dúmpý ákelgeni ras. Qazir sporttyq ınfraqurylym damymaǵan aýyldyq jerlerdiń ózinde boks, qazaq kúresi, ústel tennısi, jeńil atletıka, toǵyzqumalaq sııaqty sporttyń birneshe túri boıynsha seksııalar jumysy jandana túsken.
Áttegen-aıy sol, aýyldyq jerde mekteptiń sport zalynan basqa jattyǵatyn sport nysany joqtyń qasy. Sporttyq bilim men tájirıbesi bar talaı azamat aýylda túrli seksııalar ashqysy keledi. Sporttyq nysandardyń joqtyǵy arman otyn sóndirip, talaı chempıondar tasada qalyp jatyr. Aýyldyń shaǵyn fýtbol alańyn shańdatyp júrgen bala úlken fýtboldyń jaryq juldyzyna aınalmasyna kim kepil?
