Qorytyndyǵa sáıkes, oblystyq bıýdjetke mıllıardtaǵan teńge qaıtarylyp, memlekettik satyp alý rásimderin buzǵan 140-tan astam laýazymdy tulǵa jaýapkershilikke tartyldy.
Oblys ákimdigine qarasty Ishki memlekettik aýdıt departamentiniń basshysy Marat Egemberdıevtiń aıtýynsha, ótken jyly 119 aýdıtorlyq is-shara júrgizilse, 111-de jalpy somasy 38,8 mlrd teńgeni quraıtyn zań buzýshylyqtar anyqtalǵan.
«Memlekettik satyp alý rásimderin tekserý kezinde 19,3 mlrd teńgeniń buzýshylyqtary anyqtaldy. Qalpyna keltirýge jáne bıýdjetke óteýge jatatyn buzýshylyqtar somasynyń 4 mıllıard teńgeden astamy qalpyna keltirilip, bıýdjetke 3,1 mıllıard teńge óteldi. Aýdıtorlyq is-sharanyń qorytyndysy boıynsha 106 laýazymdy tulǵa tártiptik, 37-i ákimshilik jaýapkershilikke tartylyp, jalpy aıyppul somasy 9,3 mln teńge nemese 96,8% bıýdjetke óteldi», dedi Marat Egemberdıev óńirlik kommýnıkasııalar qyzmetinde ótken brıfıng barysynda.
Baıandamashy quqyq qorǵaý organdaryna 9 materıal jiberilgenin, olar boıynsha zań buzýshylyq somasy 1 mıllıard teńgeden astam somany quraǵanyn, jiberilgen tórt materıal boıynsha qylmystyq is qozǵalǵanyn atap ótti.
Sonymen qatar Jambyl oblysy boıynsha Ishki memlekettik aýdıt departamenti sybaılas jemqorlyqqa jol bermeý, ýaqtyly jolyn kesý jáne zań buzýshylyqtardyń aldyn alý, sondaı-aq memlekettik aýdıt obektisine memlekettik satyp alýdy óz betinshe joıýǵa quqyq berý maqsatynda memlekettik satyp alýlarǵa kameraldyq baqylaý júrgizetinin atap ótti.
