Bul kásiporyn 2003 jyly ashylyp, Ortalyq Azııadaǵy qaǵaz ónimderi men gofrlengen kartonnyń iri óndirýshisi sanalady. Munda 800-den astam adam eńbek etip keledi. Kompanııa jylyna 100 myń tonna 50 túrli ónim shyǵarýǵa qaýqarly.
Zaýyt basshylyǵy endigi kezekte óndiriske qajetti jabdyqtardy alýdy kózdep otyr. Qajetti qarajatty alý úshin О́nerkásipti damytý qoryna lızıngke ótinish bergenderin jetkizdi.
Odan keıin Marat Kárimjanuly «PK Altyn Taǵa» JShS-niń qyzmetin baǵamdap kórdi. О́ndiris aýmaǵynda 29 bloktan turatyn zaýyttyń qurylysy júrgizilip jatyr. Qazir munda 8 nysandy salý jumystary qarqyn alǵan. Osy ýaqytqa deıin atalǵan kompanııa qurylysqa 40 mlrd teńgeden astam qarajat jumsaǵan.
Sonymen qatar vedomstvo basshysy «Almaty turmystyq tehnıka» zaýytyna da barǵanyn aıta keteıik. Bul kásiporyn negizinen gaz jáne elektr plıtasy syndy turmysqa qajetti tehnıkany shyǵarýdy jolǵa qoıǵan. Aldaǵy ýaqytta televızor jáne kir jýatyn mashınany da óndirýdi qolǵa almaq. Qazir zaýyttyń óndiristik qýaty jylyna 50 myń ónim túrlerin shyǵarýǵa qabiletti. Keler jyly bul kórsetkishti 100 myńǵa jetkizý kózdelgen.
