ASTANA. 21 maýsym. Keshe túnde Brazılııanyń Salvador qalasyndaǵy «Fonte-Nova» stadıonynda Shveısarııa men Fransııa quramalary ekinshi týrdyń oıynyn ótkizdi. Match 5:2 esebimen fransýz fýtbolshylarynyń basymdylyǵymen aıaqtaldy. Bul týraly egemen.kz habarlady.
Shveısarııa – Fransııa 2:5 (0:3).
20 maýsym. Salvador. «Fonte-Nova» stadıony. 51 003 kórermen. Tóreshi - Born Keıpers (Gollandııa).
Shveısarııa: Dıego Benalo, Stefan Lıhtshtaıner, Iohan Djýrý, Stıv fon Bergen (Fılıpp Senderos, 9), Rıkardo Rodrıges, Valon Behramı (Blerım Djemaılı, 46), Gekhan Inler, Djerdan Shakırı, Granıt Djaka, Admır Mehmedı, Harıs Seferovıch (Iosıp Drmıch, 69).
Fransııa: Ýgo Lorıs, Mate Debıýshı, Rafael Varan, Mamadý Sako (Loran Koselnı, 66), Patrıs Evra, Mýssa Sıssoko, Ioan Kabaı, Blez Matıýıdı, Mate Valbýena (Antýan Grızmann, 82), Karım Benzema.
Goldar: Olıve Jırý (17), Blez Matıýıdı (18), Mate Valbýena (40), Karım Benzema (67), Mýssa Sıssoko (73), Blerım Djemaılı (81), Granıt Djaka (87).
32-mınýtta Karım Benzema penaltı soǵa almady (qaqpashy).
Eskertý: Ioan Kabaı (89).
Kópshilik bul kezdesýden qatty teketires kútip edi, biraq is júzinde munda onyń jurnaǵy da bolǵan joq. Munyń ornyna bir qarsylastyń ekinshi qarsylastyń eńsesin ezip jiberýi men tas-talqan etip jeńýin ǵana kórdi. Oıyndy asyqpaı bastaǵan Fransııa quramasy bir kezderi alań ústindegi tegershiktiń aınalýyn shuǵyl arttyrdy da, mınýttyń aınalasynda eki goldy da saldy da tastady. Olardy 17-mınýtta Olıve Jırý, 18-mınýtta Bleez Matıýıdı óz esepterine jazdy. Esep osylaı aıaq astynan kórnekti bolyp shyǵa keldi. Shveısarııalyqtar saldary sýǵa ketip, birden unjyrǵalary túsýine osynyń ózi jetip jatty. Buǵan qosa, olardyń sapyndaǵy Stıv fon Bergenniń jaraqat alyp qalýy sebepti oıynnyń basynan alańdy tastap ketýge májbúr bolýy ahýaldyń aýyrlyǵyn burynǵydan da qoıýlandyryp jiberdi.
Fransýzdar munymen de qanaǵattanbady. Olar úziliske deıin bir ret penaltı urý quqyǵyn alýmen birge, taǵy bir doptyń qarsylastar qaqpasy torynan tabylýyna qol jetkizdi. Ras, Karım Benzema qaqpaǵa baǵyttaǵan 11 metrlik aıyp dobyn golkıper Dıego Benalo qaıtara bildi. Bul chempıonat bastalǵaly bergi birinshi ret qaqpaǵa túspeı qalǵan penaltı boldy. Osydan keıingi taǵy bir shabýyl tolqynynda 40-mınýtta Mate Valbýena tablodaǵy eseptiń 3:0 bolyp janýyn qamtamasyz etti.
Al ekinshi taım fransýzdardyń aldyńǵy ústemdikterin nyǵyzdaı túsýlerine berilgen ýaqyt tárizdi kórindi. Muny aldymen 67-mınýtta Benzemanyń oıynnan gol túsirip, penaltıde ketken esesin qaıtarýy men 73-mınýtta Mýssa Sıssokonyń óz komandasy úshin sońǵy núkteni qoıýy dáleldegendeı áser etti. Degenmen, shveısarııalyqtar osydan keıin de jigerlerin janyp, esepti qysqarta túsýge múmkindik tabatyn jigerlilik tanytty. Olar ózderinen eshkim eshqandaı serpin kútpeı turǵan kezde bir doptyń qarymtasyn qaıtardy. Ony 81-mınýtta Blerım Djemaılı jasady. Al match bitýge 3 mınýt qalǵan shamada Granıt Djaka taǵy bir goldyń esesin kemitti. Sóıtip, qorytyndy esep 5:2-ge toqtady.
Damır Qojamqul.
Derekkóz: Chempıonat.Rý.
Foto: Sportbox.ru.
