ASTANA. 21 maýsym. Búgin tań aldynda Brazılııada ótip jatqan fýtboldan álem chempıonatynda Ekvador komandasy Gondýras quramasyn 2:1 etip tize búktirdi. Bul týraly egemen.kz habarlady.
Gondýras – Ekvador 1:2 (1:1).
21 maýsym. Kýrıtıba. «Arena Baıshada» stadıony. 39 224 kórermen. Tóreshi - Bendjamın Ýılıams (Avstralııa).
Gondýras: Noel Valıadares, Braıan Bekeles, Vıktor Bernardes, Meınor Fıgeroa, Emılıo Isagırre (Hýan Karlos Garsııa, 46), Bonek Garsııa (Marvın Chaves, 83), Lýıs Garrıdo (Marıo Martınes, 71), Horhe Klaros, Roher Espınosa, Djerrı Bengtson, Karlo Kostlı.
Ekvador: Aleksander Domınges, Hýan Karlos Paredes, Horhe Gýagýa, Frıkson Aıovı, Antonıo Valensııa, Osvaldo Mında (Karlos Grýeso, 83), Krıstıan Noboa, Djefferson Montero (Gabrıel Asıler, 90+1), Felıpe Kaısedo (Edıson Mendes, 82), Enner Valensııa.
Goldar: Karlo Kostlı (31), Enner Valensııa (34, 65).
Eskertýler: Vıktor Bernardes (7), Djerrı Bengtson (45+3) – Antonıo Valensııa (57), Enner Valensııa (73), Djefferson Montero (80).
Birinshi týrda Gondýras Fransııadan talassyz jeńilse (0:3), Ekvadordyń Shveısarııadan utylýy (1:2) ókinishtirek boldy. Al osy eki jasaqtyń bul jolǵy ózara kezdesýi aıtarlyqtaı jaqsy shyqty. Munda gondýrastyqtar utylyp qalǵanyna qaramastan, matchtyń sońyna deıin qarsylastarymen qasarysyp baqsa, ekvadorlyqtar alǵashqy utystary arqyly úsh upaıǵa ıe bolyp, toptan kelesi kezeńge shyǵý jónindegi úmitteriniń qolamtasyn qaıta qozdyryp qoıdy.
Degenmen, Ekvador komandasy úshin bul jeńis úlken tartyspen keldi. Sol tartysty 31-mınýtta esep ashqan gondýrastyq Karlo Kostlı bastap berdi. Al arada úsh mınýt ótkende tarazy basy qaıta teńesti. Ony Enner Valensııa jasady. Aıta ketý kerek, osy matchta ekvadorlyq bul fýtbolshy komandasynyń ekinshi golyn da soǵyp, ortaq jeńisti qamtamasyz etýmen birge, týrnırde dýbl jasaǵandardyń qataryna qosyldy.
Alaıda, oǵan deıin áli biraz ýaqyt bar edi. Ońtústik Amerıka fýtbolshylary osy goldan keıin de biraz jortýyldarǵa shyqty. Olar sonyń barysynda birneshe qaýipti aıyp soqqylaryn da jasady. Solardyń biri 43-mınýtta qaqpadan sál ǵana qıys ketti. Al taım sońyna qosylǵan ýaqytta gondýrastyqtar gol soǵyp kete jazdady. Áýeli Vıktor Bernardes qatty soqqysymen golkıperdiń apshysyn qýyrsa, artynan Karlos Kostlı basymen urǵan dobyn mańdaıshaǵa tıgizdi. Al ony qaıta uryp torǵa attandyrmaq bolǵan Djerrı Bengtson tóreshiniń paıymynsha qolymen oınap qoıǵan. Sosyn arbıtrmen sóz talastyrǵan oıynshy «sary qaǵaz» alyp tyndy.
Ekinshi taımnyń basynda Ekvador qarqyndy attyrýǵa tyrysty. Alaıda, qaqpaǵa naqty qaýip tóndirýge jete qoımady. Tek 58-mınýtta ǵana olar sondaı múmkindik aldy. Bul ýaqyttarda Lýıs Fernando Sýarestiń shákirtteri qarsylastarynan tómen oınady dep te aıtýǵa bolmaıdy. Biraq Ekvadordyń jekelegen fýtbolshylarynyń sheberlikteri basymdylyqtary baıqalyp turdy. Sol artyqshylyq aqyry jeńis dobyn da soqtyrdy. Ol 65-mınýtta Gondýras qaqpasynan bir-aq shyqty.
Damır Qojamqul.
Derekkóz: Chempıonat.Rý.
Foto: Sportbox.ru.
