Memleket basshysy Aqtóbe oblysyna jumys saparymen bardy

ASTANA. 23 maýsym. Prezıdent Nursultan Nazarbaev Aqtóbe oblysyna jasaǵan is-sapary barysynda óńirdegi birqatar óndiris oryndary men áleýmettik nysandardyń jumysymen tanysty. Bul týraly akorda.kz habarlady. Tarata aıtar bolsaq, Memleket basshysy «Qazhrom» transulttyq kompanııasy» aksıonerlik qoǵamynyń jańa ferroqorytpa zaýytyna at basyn burdy. Zaýyttyń jumysyn kórý kezinde Prezıdentke ferroqorytpa óndirisin ashý jobasy týraly baıandaldy. Sodan keıin Nursultan Nazarbaev tetikti basý arqyly zaýyttyń birinshi balqytý peshin iske qosty. Jańa zaýyttyń arqasynda elimizdiń joǵary kómirtekti ferrohrom shyǵarý boıynsha eksporttyq áleýeti 16 paıyzǵa ósedi dep kútilýde. Sondaı-aq, Prezıdent kásiporyn jumysshylarymen áńgimelesti. Olar memleket tarapynan ózderine kórsetilip otyrǵan qoldaý úshin  rızashylyqtaryn bildirdi. «Qazhrom» transulttyq kompanııasy» aksıonerlik qoǵamyna qarasty ferroqorytpa zaýytynyń jobalyq qýaty jylyna 440 myń tonna joǵarykómirtekti ferrohrom óndirýge jetedi. Kásiporynda 500-ge tarta jumys orny bar. Budan keıin Memleket basshysy Aqtóbe qalasyndaǵy «Dostyq» sý sporty túrleri ortalyǵyna bardy. Ol mundaǵy  jattyǵý zalyn jáne basseındi kórdi. 2013 jyly jeltoqsanda el ıgiligine berilgen «Dostyq» sý sporty túrleri ortalyǵy sporttyq jáne sınhrondy júzýden, sý dobynan halyqaralyq jarystar ótkizýge arnalǵan. Sondaı-aq, Prezıdent Aqtóbe qalasyndaǵy ««Dárý» klınıkasy» medısınalyq ońaltý ortalyǵynda boldy. Memleket basshysy emhana jumysymen tanysa júrip,  atalǵan medısınalyq ortalyqtyń ujymy ókilderimen, oblystyń densaýlyq saqtaý salasy ardagerlerimen jáne osynda em qabyldap jatqan azamattarmen júzdesti. Nursultan Nazarbaev: «Qarajat bólinip, medısınalyq nysandar qurylysy júrip jatyr, jańa jabdyqtar satyp alynýda. Biraq eń bastysy – dárigerlerdiń joǵary biliktiligi, qazir sizder úshin oqýǵa, sonyń ishinde shetelde taǵylymdamadan ótýge  barlyq múmkindik bar. Búkil jumystyń kózdegen nátıjesi – adamdardyń ómir jasyn uzartý, ana men bala ólimin azaıtý», – dedi. «Dárý» klınıkasy» medısınalyq ońaltý ortalyǵy 2013 jyly «Bıznestiń jol kartasy-2020» baǵdarlamasy aıasynda qoldanysqa berilgen. Budan bólek, Prezıdent Jańajol gaz óńdeý zaýytynyń qurylysyn júzege asyrý jónindegi «SNPS «Aqtóbemunaıgaz» aksıonerlik qoǵamynyń jumysymen tanysty. Memleket basshysyna Jańajol kenishinen bas dırektordyń orynbasary Tahtalıfým Esenǵulov úshinshi Jańajol gaz óńdeý zaýyty qurylysynyń 2-shi kezeńi aıaqtalǵanyn  onlaın rejiminde baıandady. О́nimdiligi jylyna 6 mıllıard tekshe metrdi quraıtyn zaýyttyń alǵashqy kezegi 2007 jyly qatarǵa qosylǵan bolatyn, endi búgin qurylystyń ekinshi kezegi aıaqtalyp otyr, al zaýyttyń úshinshi kezegin iske qosý 2014 jyldyń sońyna belgilengen. Joldybaı Bazar. Derekkóz: akorda.kz. Foto: kursiv.kz.