Qaryz alýshylar ortalyqqa qandaı másele boıynsha ótinish bere alady?
- MQU aldyndaǵy bereshekti qaıta qurylymdaý kezinde tegin jáne jedel járdem alý úshin (tólemdi keıinge qaldyrý múmkindigin, óteýdiń jańa kestesin alý jáne t.b.);
- MQU klıentpen kezdesýge barýdan bas tartsa, ótinishine múldem jaýap bermese;
- MQU qyzmetkerleri zańnamany buzsa, klıentti qorlap, ádepsizdik tanytsa shaǵymdanýǵa nemese ótinish jazýǵa bolady.
О́z kezeginde ombýdsmen mıkroqarjy uıymy men qaryz alýshy arasyndaǵy mıkrokredıt berý týraly sharttan týyndaıtyn daýlardy retteýge kómektesedi.
Ombýdsmennen kómek suramas buryn ne isteý kerek?
Aldymen nesıe berýshimen daýly máseleni óz betinshe retteýge baǵyttalǵan sharalardy qolǵa alý qajet. Ol úshin jazbasha nemese elektrondy túrde jazylǵan ótinishpen mıkroqarjy uıymyna habarlasýdy umytpańyz. MQU kúntizbelik 15 kún ishinde ótinishińizdi qarap, oǵan jaýap berýge mindetti. Eger ortaq mámilege kele almasańyzdar, ortalyq kómegine júgine alasyzdar. Eger ortalyqqa júgingennen keıin MQU qabyldaǵan sheshim sizdi qanaǵattandyrmasa, onda ombýdsmenge júginýge quqyǵyńyz bar.
Ombýdsmenge ótinishti qalaı berýge bolady?
Birinshi qadam. Kelesi qujattardy jınańyz:
- jeke kýálik;
- mıkronesıe berý týraly shart;
- óteý kestesi;
- mıkronesıe berý týraly shartqa qosymsha kelisim (bar bolsa);
- mıkroqarjy uıymyna ótinishter/joldanymdar;
- jyljymaıtyn múlik kepili týraly shart (bar bolsa);
- jyljymaıtyn múlik kepili týraly shartqa qosymsha kelisim (bar bolsa);
- ombýdsmenge júgingenge deıin MQU-men daýly máselelerdi retteý áreketterin rastaıtyn qujattar (ótinishter/joldanymdar/MQU jaýaptary (bar bolsa).
Ekinshi qadam
- ótinishtiń úlgisin mfohelp.kz saıtynan júktep alyp toltyryńyz;
- onyń janyna joǵarydaǵy barlyq qujatty qosyńyz;
- manager@mfohelp.kz poshtasyna joldańyz.
Úshinshi qadam. Eki nusqany toltyra otyryp derbes derekterdi jarııalaýǵa kelisim berý qajet:
- mıkronesıe berý qupııasyn jarııalaýǵa kelisim;
- derbes derekterdi jınaýǵa jáne óńdeýge kelisim. Kelisim nysandary mıkroqarjy ombýdsmeniniń saıtynda kórsetilgen.
Ortalyqqa qalaı júginýge bolady?
Mıkroqarjylyq qyzmetterdi tutynýshylardyń quqyqtaryn qorǵaý, onyń ishinde mıkrokredıt boıynsha tólemdi keıinge qaldyrýdy usynýdyń barlyq máseleleri boıynsha ortalyqqa kelesi nómir arqyly habarlasa alasyz: +7 771 933 34 44.
