Úsh kún aralyǵynda PIB MO-nyń 25 bilikti mamany shahardyń jetekshi klınıka dárigerlerimen birge júzden asa naýqasqa medısınalyq keńes berip, ondaǵan kúrdeli operasııaǵa qatysty.
Shekteýsiz merzimge jasalǵan memorandýmdyq kelisim qala turǵyndaryna dárigerlerdiń tegin konsýltasııalaryn, sanatorıı-kýrorttyq emdeý jáne medısınalyq ońaltý boıynsha qyzmetterdi alýǵa, al qajet bolǵanda jaǵdaıy aýyr naýqastardy emdeýge múmkindik beredi. Sondaı-aq ortaq kelisimniń nátıjesinde, óńirdiń medısınalyq mekeme qyzmetkerlerine ınnovasııalyq tehnologııalardy oqytý, aýrýlardyń aldyn alý, dıagnostıkalaý, jańa medısınalyq tehnologııalar men ınnovasııalyq ádistemelerin damytý salasynda tájirıbe almasý týraly ýaǵdalastyqqa qol jetkizildi.
Shymkent qalasynyń ákimi Murat Áıtenov medısınalyq ortalyqtyń bul bastamasyn qoldap, memorandýmnyń aldaǵy ýaqytta óńirdegi medısına salasynyń damýyna aıtarlyqtaı yqpal etetinin atap ótti.
«Úshinshi megapolıste tegin medısınalyq kómek kórsetýdiń kepildik berilgen kólemi sheńberinde 45 emhana halyqqa qyzmet kórsetip otyr. Onyń 13-i – memlekettik, 32-si – jekemenshik uıym. 2022 jyly ólim-jitim sany myń turǵynǵa shaqqanda 36 paıyzǵa azaıǵan. Onyń ishinde náresteler, qan aınalymy aýrýlary men qaterli isik saldarynan bolatyn ólim-jitim sany birshama tómendedi. Biz óńir medısınasyn ári qaraı damytý maqsatynda Prezıdent Is basqarmasy Medısınalyq ortalyǵyna qarasty mekemelermen baılanys ornatyp, olardyń dıagnostıkadaǵy zamanaýı múmkindikterin qoldanyp, tájirıbe almasýdy kózdep otyrmyz. Qazir memlekettik-jekeshelik áriptestik sheńberinde onkologııalyq aýrýlardy erte dıagnostıkalaýǵa qol jetkizdik. Iаǵnı qalalyq aýrýhana janynan qurylǵan ıadrolyq medısına ortalyǵynda PET/KT qurylǵysynyń kómegimen jylyna 3 500 adamǵa dıagnostıka jasaýǵa múmkindik bar. Al sáýleli emdeý qurylǵysynyń kómegimen jylyna 10 myńnan asa adamǵa em júrgizýge bolsa, osy kúnge deıin 180 naýqas qurylǵynyń kómegimen emdelip shyqty. Sondaı-aq kúrdeli medısınalyq qurylǵylardyń kómegimen operasııanyń barlyq túrin ózimiz jasaı bastadyq. Aldaǵy ýaqytta kópbeıindi klınıkalyq aýrýhana men perınataldyq ortalyq ashý kózdelip otyr. Medısınalyq ortalyqpen yntymaqtastyq memorandýmyna qol qoıýdaǵy maqsattyń biri – joǵaryda atalǵan josparlardy birlesip júzege asyrý», dedi shahar basshysy.
О́z kezeginde Medısınalyq ortalyq basshysy Alekseı Soı Prezıdent Is basqarmasy Medısınalyq ortalyǵynyń ǵasyrǵa jýyq – 90 jyldan asa ýaqyt elimizdiń densaýlyq saqtaý júıesiniń iri mekemesine aınalǵanyn aıtty.
«Prezıdent Is basqarmasynyń Medısınalyq ortalyǵy bilim berý, ǵylymı-zertteý jumystaryn, sanıtarlyq-epıdemıologııalyq zertteýler, ınnovasııalyq ádisterdi izdestirip, ony tájirıbe júzinde qoldanyp jatyr. Olar respýblıkanyń praktıkalyq densaýlyq saqtaý salasyna transfertin júrgizedi. Keıingi úsh jyldyń ózinde klınıkanyń mamandary 150-den asa jańa tehnologııany respýblıkanyń tájirıbesine alǵashqylardyń biri bolyp engizdi. Búginde oblystyń 130-dan asa azamaty Medısınalyq ortalyq uıymdarynda kómek alyp, emdeý-saýyqtyrýdan jáne ońaltýdan ótti. Biz budan ári óńirdiń turǵyndaryna praktıkalyq medısınalyq kómek kórsetýdi arttyrýdy josparlap otyrmyz», dedi.
Sondaı-aq issapar aıasynda megapolıstegi Santo farmasevtıkalyq kompanııasy men PIB Medortalyǵy arasynda medısınalyq jáne farmasevtıkalyq tehnologııalar boıynsha yntymaqtastyqty arttyratyn ekijaqty memorandým túzildi. Qol qoıý rásiminen soń jýrnalısterge bergen suhbatynda Alekseı Soı men «Hımfarm» AQ Bas dırektorynyń mindetin atqarýshy Ádilhan Temirbekov medısına men densaýlyq saqtaýdy damytýǵa baǵyttalǵan ózekti máselelerdi birge sheshýge kúsh salatyndaryn jetkizdi.
Sonymen birge taraptar ózara yntymaqtastyqtyń birqatar baǵytyn aıqyndady. Máselen, onyń ishinde ǵylymı-zertteý jáne ınnovasııalyq qyzmetti birlesip júzege asyrý, klınıkalyq zertteýler júrgizý salasynda áriptestikti damytý maqsattary bar.
Sondaı-aq bul qujat taraptardyń uzaq merzimdi ózara utymdy seriktestigin nyǵaıtýǵa, ǵylymı-zertteý zerthanalarynda PIB Medısınalyq ortalyǵy men Santo kompanııasynyń qyzmetkerleriniń jumysyn qoldaýǵa, praktıkalyq tájirıbe almasýǵa jáne klınıkalyq tıimdilikti eskere otyryp, dáleldi medısına qaǵıdattary negizinde densaýlyq saqtaý tehnologııalaryn baǵalaý men irikteýge baǵyttalǵan.
Kelissóz barysynda ortalyq pen farmasevtıkalyq zaýyt basshylyǵy jumys tıimdiligin arttyrýǵa, ol úshin túrli tıimdi áreketti paıdalanýǵa, turaqty túrde aqparat almasyp otyrýǵa jáne kóbirek halyqaralyq tájirıbege súıenýge ýaǵdalasty.
Memorandým aıasynda delegattar farmasevtıkalyq kompanııanyń dári-dármek shyǵaratyn joǵary tehnologııaly jáne tártip pen tazalyq qatań rejimde saqtalatyn sehtarynda bolyp, jumysymen tanysyp shyqty. Ortalyq basshysy dárilik prepattar óndirisindegi otandyq kásiporynnyń alǵa basqan qadamdaryn oń baǵalap, atqaryp jatqan eńbeginiń nátıjesi óte joǵary ekenine senim bildirdi.
«Ult saýlyǵyn nyǵaıtý – eldiń basty mindetteriniń biri. Osyǵan oraı Memleket basshysy Qasym-Jomart Toqaev densaýlyq saqtaý júıesin damytýdyń basty baǵyttaryn aıqyndap berdi. Sondyqtan eń birinshi mindet – ozyq medısınalyq tehnologııa men álemdik standarttarǵa saı sapaly medısınalyq kómek kórsetýdiń qoljetimdiligin arttyrý. Prezıdent Is basqarmasynyń Medısınalyq ortalyǵynyń jospary boıynsha elimizdiń ár óńirinde osyndaı tájirıbe almasý kúnderi ótedi. Álbette, óńirlik densaýlyq salasy týraly oı aıtsaq, Shymkentti medısına kadrlaryn daıarlaıtyn ustahana deýge bolady. Al ortalyqtyń basty qyzmeti – halyqqa medısınalyq qyzmet kórsetýmen qatar álemdegi ozyq tájirıbelerdi elimizge ákelip, jergilikti emdeý mekemelerine qoldanysqa engizýge járdemdesý», dedi A.Soı.
Aıta ketý kerek, 140 jyldyq tarıhy bar «Hımfarm» AQ kompanııasy Qazaqstannyń farmasevtıkalyq naryǵyndaǵy kóshbasshy kásiporyndardyń úshtigine kiredi jáne dári-dármektiń bólshek saýdasynda birinshi orynǵa ıe.
ShYMKENT
