Erbol Qarashókeev aýyl sharýashylyǵy jónindegi eýrokomıssar Iаnýsh Voısehovskıımen kelissózder barysynda el Úkimetiniń EO-men saýda-ekonomıkalyq áriptestikti odan ári keńeıtýge daıyndyǵyn atap ótti. Naqtyraq aıtqanda, otandyq balyq ónimderin Eýroodaq elderine eksporttaý týraly sóz boldy. Tıisti kelissózder prosesteri aıaqtalyp qaldy. Fransııa jáne Shveısarııa qazaqstandyq balyq ónimderin satyp alatyny týraly kelisim bar.
Aıta keteıik, ótken jyldyń qorytyndysy boıynsha elimizdegi balyq ónimderiniń EO elderine eksporty 1,5 esege artyp, 8,7 myń tonnany quraǵan. Negizgi tutynýshylar Polsha, Slovakııa, Chehııa, Nıderlandy, Lıtva, Latvııa, Danııa, Avstrııa jáne Germanııa boldy.
Sondaı-aq elimiz eýropalyq naryqqa bal, jylqy eti, sıyr eti men sút ónimderin jetkize alady.
Al eýrokomıssar Stella Kırıakıdespen kezdesý barysynda Qazaqstan men EO elderi arasyndaǵy saýdany damytýdyń ózekti máseleleri talqylandy.
«Bıyl kúshine engen mıkrobqa qarsy preparattardy profılaktıkalyq maqsatta qoldanýǵa tyıym salý týraly Eýropalyq zańnamaǵa engizilgen ózgerister eýropalyq memleketterden Qazaqstanǵa asyl tuqymdy maldy eksporttaý kezinde qıyndyqtar týǵyzady», dedi kezdesýde Erbol Qarashókeev.
Osy máseleni retteý úshin mınıstr ekijaqty veterınarııalyq sertıfıkattarǵa ózgerister engizýdi saraptamalyq deńgeıde pysyqtaýdy usyndy.
Sondaı-aq AShM basshysy Qazaqstanǵa janýarlar aýrýlarynyń ákeliný qaýpin azaıtý boıynsha birlesken sharalardy ázirleý qajettigin atap ótti. Mal sharýashylyǵyn damytýdyń túrli baǵdarlamalary aıasynda elge Eýropalyq Odaq elderinen 57 myń asyl tuqymdy mal ákelindi.
Aıta keteıik, Qazaqstannyń syrtqy saýdasynyń shamamen 30%-y EO-nyń úlesine tıesili. 2022 jyldyń qorytyndysy boıynsha aýyl sharýashylyǵy óniminiń taýar aınalymy 35,6%-ǵa ósip, 995,5 mln dollardy quraǵan. Qazaqstanda zyǵyr, bıdaı, raps jáne óńdelgen dándi daqyldardyń eksporty da ulǵaıǵan.
