Komıtet tóraǵasy Asqar Shákirov Parlament Senaty kóktemgi sý tasqynyna baılanysty problemalyq máselelerdi jyl saıyn kóterip kele jatqanyn atap ótti. Ol sońǵy jyldary kóktem kelgen saıyn sý tasqyny bolatynyn jáne ol myńdaǵan aýyl turǵyndary qıyn jaǵdaıda qalatynyn eske túsirdi.
– Atqarýshy bılik tótenshe jaǵdaılarǵa daıyndyq týraly jyl saıyn esep beredi, alaıda sý tasqyny kezinde kúsh-qýat pen qural-jabdyq udaıy jetispeı qalady. Keıinnen sonyń zardaptaryn joıýǵa ájeptáýir bıýdjet qarjysy jumsalady, – dedi Asqar Shákirov.
Senator bul kezdesýdiń maqsaty – ıesiz gıdrotehnıkalyq qurylystardy kommýnaldyq menshikke berý, gıdrometeorologııalyq qyzmetterdiń jaı-kúıi jáne basqa da birqatar mańyzdy máselelerdi talqylaý ekenin aıtty.
Jıynda Tótenshe jaǵdaılar mınıstriniń orynbasary Mereke Pishembaev sý tasqynynyń aldyn alýǵa qatysty baıandama jasady. Ol jyl basynan beri jaýyn-shashynnyń jıileýi men temperatýranyń kúrt kóterilýiniń kesirinen 1 úı men 46 eldi mekendegi 317 aýla aýmaǵy zardap shekkenin jáne 24 jol ýchaskesin sý shaıyp ketkenin tilge tıek etti. Apat saldaryn joıý úshin TJM kúshimen sý sorý, qum toly qapshyqpen aǵyn jolyn bógeý jáne sý ketetin arnalardy tazartý jumystary júrgizildi. Búginde sınoptıkterdiń aldyn ala boljamy boıynsha sý tasqyny qaýpi tónetin aımaqtar anyqtaldy. Zerdeleýden soń Soltústik Qazaqstan, Shyǵys Qazaqstan, Aqmola, Qaraǵandy, Aqtóbe, Almaty, Jambyl, Túrkistan, Qyzylorda, Batys Qazaqstan, Atyraý, Qostanaı oblystarynda, sondaı-aq Abaı jáne Jetisý oblystarynda da qater qaýpi joǵary ekeni anyqtaldy.
Sondaı-aq senatorlarǵa sý tasqyny jaǵdaıyna daıyndyq aıasyndaǵy sharalar týraly ekologııa jáne geologııa mınıstriniń orynbasary Galıdýlla Azıdýllın aıtyp berdi. Onyń aıtýynsha jedel shtab qurylyp, kezekshilik kestesi bekitildi, sondaı-aq tasqyn sýdy jiberip jınaqtaıtyn qaýipsiz oryn bekitilgen.
Jıynda Almaty, Túrkistan, Jambyl jáne Qyzylorda oblystary ákimderiniń orynbasarlary da senatorlardy jergilikti jerlerdegi jaǵdaı týraly habardar etti. Asqar Shákirov kezdesýdi qorytyndylaı kelip, apatty jaǵdaılardyń aldyn alý úshin sý nysandaryna turaqty monıtorıng uıymdastyrýdyń, baqylaý pýnktteri men gıdrobıologııalyq kórsetkishter stansalaryn kúsheıtý mańyzdylyǵyna toqtaldy.
– Tótenshe jaǵdaılardyń týyndaý qaýpin baǵalaý kezinde transshekaralyq sý obektileriniń bolýyn eskerý qajet. Osyǵan baılanysty transshekaralyq sý obektilerin basqarý salasyndaǵy halyqaralyq yntymaqtastyqty damytý jáne keńeıtý, qoldanystaǵy sharttar men kelisimderdi eskere otyryp, sharalar keshenin júzege asyrý mańyzdy baǵyttardyń biri bolyp tabylady, – dedi komıtet tóraǵasy.
Kezdesýde elimizdegi sý tasqyny jaǵdaıyna qarsy is-qımyl týraly aıtylǵan usynystar salalyq mınıstrlikterdiń jumys barysynda, sondaı-aq depýtattardyń zań shyǵarý qyzmetinde eskeriledi.
