Názik jandylar gúl tilinde sóılesken.
Kóne zamanda sóıleý jáne júzin kórsetý quqyǵynan aıyrylǵan Shyǵystyń áıelderi birde-bir sózi joq til oılap tabady. Olar ishki sezimderi men kóńil-kúılerin dál osy gúlderdiń kómegimen jetkizýdi úırenedi. Gúl – únsiz áńgimelerdiń sımvolyna aınalady. Keıinirek bul dástúr Eýropada keńinen tarap, tanymaldylyqtyń shyńyna jetti. Gúl shoqtarynyń kómegimen adamdar aıtýǵa batyly barmaǵan sózderdi, ıaǵnı bireýge degen súıispenshiligin, ishinde jatqan oılary men tilekterin jetkizip júrdi. Ýaqyt óte arnaıy habarlamasy bar gúl shoqtaryn daıyndaıtyn «florıster» paıda boldy. Qazir bul til tanymaldylyǵyn joǵaltty. Dese de gúl shoqtaryn jasaıtyn keıbir erejeler áli kúnge deıin qoldanylady.
Adam ata men Haýa ana
Keı ańyzdarǵa kóz júgirtip qarasaq, jumaq turǵyndary Adam ata men Haýa ana tańǵajaıyp gúlder ósetin baqta ómir súrgen. Qudaı kúná jasaǵany úshin Adam atany jazalaımyn degen oımen baqty qıratady, al ondaǵy ósimdikter qýrap qalady. Adam ata men Haýa ana jazalanyp, Jerge jiberiledi. Haýa ana jumaqtaǵy sátterin ańsap, gúlderdiń ıisin saǵynady. Ol kezde jer beti tep-tegis shól dala edi. Adam ata Haýa ananyń qınalǵanyn kórip, oǵan jumaqty esine túsiretin bir shoq gúl syılaǵysy keledi. Ol gúl izdeıdi, biraq esh jerden tappaıdy. Sodan soń úmitin úzgen Adam ata tizerlep otyryp jylaıdy. Nátıjesinde er adamnyń kóz jasy aqqan jerden ádemi gúl shoqtary ósip shyǵady. Qýanyshtan basy aınalǵan ol gúlderdi terip alyp, Haýa anaǵa syılaıdy. Sodan beri áıel adamdarǵa gúl shoqtaryn berý dástúrge aınalyp ketken desedi.
Munda bul dástúrdiń shyǵýyna qatysty barlyq nusqany qarastyrmadyq. Mańyzdylary – osy. Alaıda bul gúl syılaý dástúriniń shyǵý tarıhy dál osylaı boldy degen sóz emes. Bul dástúr barlyq elde keń taralǵan. Desek te, gúl berý – er adamdardyń áıelderge degen qurmeti men mahabbatyn bildirýdiń negizgi joldarynyń biri bolyp qala beredi.
