Qusty baýlyp ańǵa salý árkimniń peshenesine jazyla bermeıtin qadirli de qasıetti óner. Sondyqtan da dástúrli qazaq qoǵamynda onyń alar orny erek. Jetisý óńiri óz aldyna jeke oblys bolǵaly alǵash ret qusbegilerdi bir shańyraq astyna jınap, ulttyq oıynnyń kórkin qyzdyrdy.
Eskeldi aýdanyna qarasty Jetisý aýylynyń qysy janǵa jaıly, qońyr salqyn, sporttyq is-sharalar ótkizýge óte yńǵaıly. Muny kórgen Qazaqstan qusbegiler federasııasynyń jaýapty mamandary saıasatshylyq jarysyn ótkizýge osy jerdi tańdapty. Jarystyń qolaıly ótýine barlyq jaǵdaı jasalǵan. Bul ıgilikti isti oblystyq dene shynyqtyrý jáne sport basqarmasy mamandary moıynǵa alyp, barynsha abyroımen ótkizýge tyrysty. Solaı boldy da.
Qusbegilerdiń jyl saıynǵy jaýapty jarystary Almaty oblysynyń Narynqol óńirinde ótetin. О́ńir ekige bólingennen keıin, dástúrli dodany ótkizý kezegi jetisýlyqtarǵa buıyrdy. Sol kúni tabıǵatta tosyn minez tanytpady, kún de kúlimdep turdy.
Jastar arasyndaǵy qusbegilerdiń HIV respýblıkalyq chempıonatyna Almaty, Túrkistan, Abaı, Atyraý, Mańǵystaý, Shyǵys Qazaqstan oblystary men Astana jáne Almaty qalasynyń qusbegileri qatysty. Ashylý saltanatyna jınalǵan aǵaıynnyń qarasy kóp boldy. Eki kúnge sozylǵan jarys eldiń esinde qaldy. Balapan kúninen baptaǵan ártúrli ańshy qustyń aılasy, bitim-bolmysy, minezi kópshilikti tańdaı qaqtyrdy.
Jarys sońynda eń úzdik kórsetkishterge ıe bolǵan jeńimpazdar arnaıy júldelerge ıe boldy. Búrkitshiler arasynda Atyraý oblysynan kelgen Imanǵalı Ábdikárimuly chempıon bolsa, qarshyǵa salýda Almaty oblysynyń ókili Seıitjan Beksultan úzdik atandy. Itelgi salýdan Túrkistan oblysynan kelgen Músálim Salmanǵa teń keler qusbegi bolǵan joq.
Al Túrkistan oblysynyń qusbegileri 1 altyn, 1 kúmis, 2 qola medalǵa ıe boldy. Atyraý jáne Almaty oblysynyń ókilderi bir-birden altyn medaldy jeńip aldy.
Jetisý oblysy
