- Mýhammed Bın Rashıd mektebiniń Prezıdenti Alı Al Marrımen «Public Administration», «Public Policy» magıstrlik baǵdarlamalary boıynsha qos dıplomdyq ortaq baǵdarlama ashý, bilim alýshylar men professorlyq quram arasynda akademııalyq almasý baǵdarlamalaryn uıymdastyrý, ortaq zertteýler júrgizý, sondaı-aq memlekettik qyzmetshilerdiń biliktiligin arttyrý baǵytyndaǵy taǵylymdamalardy uıymdastyrý máselelerin talqylap, biraqatar kelisimge keldik,- dedi BAÁ saparynda qol jetkizgen nátıjelerdi sóz etken Akademııa rektory Erlan Ábil.
Sonymen qatar Akademııa rektory Anýar Gargash Dıplomatııalyq akademııasynyń Bas dırektory Nıkolaı Mladenovpen kezdesý barysynda yntymaqtastyqtyń negizgi baǵyttary, atap aıtqanda, dıplomatııa jáne memlekettik basqarý salasynda birlesken zertteýler júrgizý, oqytýshylyq qurammen almasý jáne bilim alýshylarǵa arnalǵan taǵylymdama uıymdastyrý, memlekettik qyzmetshilerdiń biliktiligin arttyrý salasynda tájirıbe almasý máselelerin talqylady. 
Al Anvar Gargash Dıplomatııalyq akademııasy óz kezeginde Parsy shyǵanaǵyndaǵy Arab elderi jóninde zertteý júrgizetin Qazaqstan zertteýshilerin Birikken Arab Ámirlikterine, al Orta Azııa elderine qyzyǵýshylyǵy bar óz akademııasynyń professorlaryn Qazaqstanǵa jiberýdi usyndy.
Eske salsaq, jyl basynda Memleket basshysynyń BAÁ-ge resmı sapary barysynda eki oqý orny arasynda yntymaqtastyq týraly memorandýmǵa qol qoıylǵan edi.
Kezdesý sońynda Anvar Gargash Dıplomatııalyq akademııasy jáne Mýhammed Bın Rashıd mektebiniń basshylyǵy Akademııanyń uıymdastyrýymen osy jyldyń 27-28 sáýirinde ótetin jyl saıynǵy halyqaralyq ǵylymı konferensııada júzdesýge ýaǵdalasty.
