Kollajdy jasaǵan Záýresh SMAǴUL, «EQ»
Birinshi nesıe bıýrosynyń málimetinshe, bank nesıe berýge sheshim qabyldaıtyn kezde lombardtardyń nesıe tarıhyndaǵy jazbalardy tekseredi.
Sondaı-aq nesıe bıýrosy «lombardtaǵy ótelmeı qalǵan qaryz salymshynyń nesıe tarıhyna qalaı áser etedi» degen suraqqa da jaýap berdi.
«Ár qarjy ınstıtýtynda nesıe berý týraly sheshim qabyldaýdyń ózindik júıesi bar. Birinshi kezekte kredıtorlar aldyndaǵy mindettemelerdi oryndaý kezinde tólem tártibine nazar aýdarylady. Bank mıkroqarjy uıymdarynyń kez kelgen basqa jazbalary sııaqty lombardtardyń da nesıe tarıhyndaǵy jazbalardy qaraıdy. Bank ishki kredıttik komıtetter deńgeıinde qaryz alýshynyń tólem qabilettiligin baǵalaýdyń basqa da faktorlaryn eskere otyryp, lombardtardyń kredıt tarıhyndaǵy jazbalardy qalaı esepke alý kerektigin sheshedi», dep habarlady.
Demek lombardqa baryp, altyndy qaıtaryp almaýyńyz nesıe tarıhyńyzda mindetti túrde kórsetiledi. Biraq bul aqparat klıentke nesıe berýge kedergi keltire me, joq pa, ony ár banktiń ishki bólimderi derbes jáne óz erejeleri boıynsha sheshedi. Sebebi ekinshi deńgeıli bankterde ótinish táýekel bólimi mamandarynyń súzgisinen ótip baryp, maquldanady. Avtomattandyrylǵan skorıng júıesi árbir bankte bar. Maquldaý nemese bas tartý parametri sol jerde avtomatty túrde ornatylady. Onyń qalaı jumys isteıtinin tap basyp aıtý qıyn. Ondaǵan jyldar buryn altynyn keri satyp almaǵany týraly derek te nesıe tarıhyna keri áserin tıgizýi múmkin. Munyń bári ótinish berýshiniń sodan keıingi nesıelerindegi tólem tártibine baılanysty. Mysaly, nesıeni merziminen buryn japqany týraly derekter lombardqa qatysty tarıhty «jýyp» jiberýi múmkin.
Osylaısha, lombardta ótelmegen altyn kez kelgen jaǵdaıda nesıe tarıhynda kórsetiledi. Biraq joǵaryda aıtylǵandaı, bul nesıe berý týraly sheshimge áser ete me, joq pa, ony ár bank ózinshe sheshedi.
ALMATY
