Ýnıversıtettiń uıymdastyrýymen 8-10-synyp oqýshylary arasynda «Jas zertteýshi jáne jaratylystaný ǵylymdarynyń damýy» atty I respýblıkalyq ǵylymı jobalar konkýrsy ótti. Baıqaý balalardyń zertteý qyzmetine qatysty daǵdylaryn damytý, orta jastaǵy mektep oqýshylarynyń ıntellektýaldyq-shyǵarmashylyq áleýetin yntalandyrý maqsatynda uıymdastyryldy. Sondaı-aq zertteý jumystaryna qyzyǵýshylyq tanytqan daryndy oqýshylardy anyqtaý jáne olarǵa qoldaý kórsetý, oqýshylardyń úzdik jetistikterin nasıhattaý, oqýshylardyń ózara qarym-qatynastaryn uıymdastyrý, qoǵamnyń turaqty damý maqsattaryna kópshiliktiń nazaryn aýdarý syndy mańyzdy ustanymdardy da kózdegenin atap óteıik.
Aldymen mektepishilik deńgeıde birinshi kezeńi ótip, ekinshi kezeńi ýnıversıtette uıymdastyryldy. Úshinshi qorytyndy kezeńge oqýshylar barynsha iriktelip, daıyndalyp kelýge múmkindik jasaldy. Konkýrsqa elimizdiń ár oblysynan, Nazarbaev zııatkerlik mektepterinen hımııa, bıologııa jáne geografııa seksııalary boıynsha jalpy 58 jumys tirkelip, irikteý nátıjesi boıynsha konkýrstyń úshinshi kezeńine 24 ǵylymı joba joldama alyp, qorǵaldy.
– Ǵylymnyń damýyna tikeleı úles qosatyn jastar, búgingi mektep oqýshylary ekeni sózsiz. Sebebi mektep kezinen ǵylymǵa qushtar, jańa ıdeıany iske asyrýǵa daıyn oqýshylar bolashaqta qazaqtyń myqty ǵalymdary bolary anyq. Shara aıasynda túrli baǵytta qyzyqty da jańalyǵy mol ǵylymı jobalar qorǵaldy. Jeńimpazdar men úzdik jobalardyń jetekshileri alǵys hattarmen jáne dıplomdarymen, arnaıy syılyqtarmen marapattaldy. Ǵylymı jobanyń qatysýshylary myqty hımıkter, bıologter jáne geografter ekenine bárimiz birdeı kýá boldyq. Olar – bolashaq ǵalymdar. Ýnıversıtet basshylyǵynyń qoldaýymen ǵylymı jobalar konkýrsy aldaǵy jyldary da jalǵasyn tabady, – deıdi ýnıversıtet qyzmetkeri, jas ǵalym Baqtybaı Jaılaý.
El ǵylymyn damytý úshin jastarǵa osy bastan qamqorlyq jasap, olardy belgili bir ǵylymı salaǵa baǵyttaý, úzdik nátıjege qol jetkizýge umtyldyrý – aǵa býynnyń mindeti. «Mektep jasyndaǵy balalarmen mektep aınalyssyn» dep otyrmaı jaqsy iske bastamashy bola bilgen ýnıversıtet ujymyna rızashylyq bildirgender de az emes.
«Mundaı is-sharalar aıtýǵa turarlyq jańalyq! Jastardy qoldaý degen jaqsy sóz olarǵa shabyt beretin osyndaı is-sharalar arqyly súıemeldenýi kerek. Búkil álem blogerlikke bet buryp turǵanda, «ǵylym jolyn qýamyn» degen órenderge «Bárekeldi!» desek jarasar», dep muhıttyń arǵy betinde bilim alyp júrgen IT-maman Tımýr Bektur áleýmettik jeli arqyly ystyq yqylasyn jetkizdi.
Jastarǵa motıvasııa berý, alǵa umtyldyrý – jaýapty is. Olarǵa bólingen nazar men quıylǵan ınvestısııa – el erteńi úshin qalanǵan kirpish. Aǵa býynnan qoldaý, qamqorlyq kórgen jastar el tiregine aınalary anyq.
Mańǵystaý oblysy
