Oblystyq shtabtyń málimetinshe, bir táýlikte Qobda aýdanynyń Qobda aýylynda 51 úı, Dene-shynyqtyrý saýyqtyrý ortalyǵy, kafe jáne tehnıkalyq qyzmet kórsetý ortalyǵyn sý basty. Zardap shekkender joq. 91 adam qaýipsiz jerge kóshirildi.
Apattyq-qutqarý jumystaryna 128 adam, 37 birlik tehnıka, 9 birlik sý sorǵylaý quraldary jumyldyryldy. Materıaldyq qundylyqtardy evakýasııalaý, ınertti materıaldardy tasymaldaý, úılerdiń mańyna ınertti materıal jáne qapshyqtardy tóseý boıynsha sharalar qabyldandy. Jergilikti ýaqytpen saǵat 20:45-te Qobda aýdanynyń ákimi B.Qulovtyń 14.03.2023 jylǵy №1 sheshimimen jergilikti deńgeıdegi tótenshe jaǵdaı jarııalandy.
Jaryq aýylyna kirer joldaǵy úlken Qobda ózenindegi kópirdiń tolyp ketýi, О́tek aýylynyń qasyndaǵy О́teksaı ózenindegi kópirdiń jáne Qanaı aýylyndaǵy aýyldyq joldyń, Egindibulaq aýylynyń ishinde ornalasqan Baptaqty ózenindegi kópirdiń shaıylýyna baılanysty 6 eldi meken kólik qatynasynsyz qaldy (Aqshataý aýyly - Oıyl aýdany; Sarybulaq, Jaryq, О́tek, Qanaı, Egindibulaq aýyldary - Qobda aýdany). Temir aýdanynyń Babataı kentinde erigen qar sýy deńgeıiniń kóterilýine baılanysty Babataı aýylyndaǵy turǵyn úılerdi sý basý qaýpi týyndady, sý basýdyń aldyn alý boıynsha jedel sharalar qabyldandy, jaǵdaı turaqty.
Jalpy óńirdegi sý tasqynyna qarsy is-sharalarǵa 138 assenızator, 415 birlik arnaıy tehnıka, 20 mobıldi brıgada, 474 adam jumyldyryldy. Qazirgi ýaqytta Aqtóbe qalasy boıynsha sý basqan kósheler joq. Erekshe baqylaýdaǵy 4 ýchaskede erigen qar sýynyń jınalýyna qaraı merzimdi sorǵylaý júzege asyrylady.
