Budan buryn Oral qalasynda qarǵyn sýdan zardap shekken úıler týraly aıtqanbyz. Endi óńirdegi shaǵyn ózender arnasynan asyp, jaǵalaýdaǵy eldi mekenderge qaýip tóndirip jatyr.
Osyǵan oraı Oral qalasynda, Shyńǵyrlaý, Bórli jáne Báıterek aýdandarynda jergilikti masshtabtaǵy tabıǵı sıpattaǵy tótenshe jaǵdaı jarııalandy.
Bórli aýdanynda erigen qar sýy birneshe eldi mekenge kirip ketti. Aqbulaq aýylyndaǵy sý bógeti buzylyp, Aqsaı qalasynyń Qyzyltal jáne Araltal aýyldaryn sý basý qaýpi kúsheıgen. Ondaǵan úıge sý kirgen. Aqsaı qalasynda da baspanasy sýǵa ketken 13 adam evakýasııalandy. Aqbulaq aýylynda 14 úıge sý kirip, 44 adam kóshirilgen, sonyń 13-i balalar. Keńtúbek aýylynda 6 úıge sý kirip, 22 adam qaýipsiz aımaqqa evakýasııalanǵan.
О́ńirdegi kúrdeli jaǵdaıǵa baılanysty Atyraý Mańǵystaý oblystarynan 111 adamnan turatyn qutqarýshylar toby kómekke kelgen bolatyn. Atyraýlyq 25 adam men 6 tehnıkadan turatyn TJD toby Bórli aýdanyna bekitildi. Qutqarýshylar birneshe topqa bólinip, qyzyl sý júrip jatqan Qyzyltal, Baqtyaral jáne Qarashyǵanaq aýyldarynda iske kiristi. Tabıǵı apatqa qarsy kúreske jergilikti turǵyndar, eriktiler de úles qosýda.
Batys Qazaqstan oblysy Tótenshe jaǵdaılar departamenti bastyǵynyń orynbasary polkovnık Qanat Dospaev naýryzdyń 14-i kúni keshte Bórli aýdanynda 39 úı, Terekti aýdanynda 1 úı áli sý ishinde turǵanyn habarlady.
Qaýipti jerlerden aldyn ala 232 adam kóshirilgen bolsa, jaǵdaı qalypqa túsken aımaqtarda 26 adam óz mekenine qaıta oralǵan. Qaýipsiz jerge 282 bas mal, 20 qus aıdaldy.
Keı jerde erigen qar sýy dalamen jóńkilip, kúre joldardyń ústin basyp ótip jatyr. Olardyń keıbiri joldy búldirip ketken. Mysaly, 11 jerde jol ýaqytsha jaramsyz bolyp qalǵany habarlandy. Onyń biri – Terekti aýdanynyń ústimen Reseıge shyǵatyn respýblıkalyq mańyzy bar avtojol.
Qaýipsizdik maqsatynda jol polısııasy 14 naýryz kúni Samara-Shymkent jolynyń Barbastaý aýyly tusynda aýyr salmaqty júk kólikterin toqtatyp qoıdy. Júzdegen júk kóligi jol boıynda tur.
Oblystyń óz ishinde 12 eldi mekenge kólik qatynaspaı qaldy. Onyń 3-i Shyńǵyrlaý, 9-y Qaratóbe aýdandarynda.
Naýryzdyń 14-i kúni keshkisin Oral qalasy mańyndaǵy Mashtaqov aýylyn sý basý qaýpi týyndap, eldi mekenniń 70-80 turǵyny óz týystaryn saǵalap aýyldan shyǵyp ketti. Zardap shekken turǵyndardy ýaqytsha panalatý úshin Derkól aýylyndaǵy Mádenıet úıi ázirlenip, kólik te saılanyp tur.
Jerdiń tońy túspeı jatyp erigen bıylǵy qar sýy batysqazaqstandyqtardy erekshe synap tur. Tótenshe jaǵdaılar departamentiniń habarlaýynsha, apattyq-qutqarý jumystaryna tótenshelikterden – 252 adam, Ishki ister qyzmetinen – 163 adam, Ulttyq ulannan – 60 jaýynger, Qorǵanys mınıstrliginen – 16 adam, barlyǵy 1 myńǵa tarta adam kúni-túni etigimen sý keship júr eken. Sońǵy kúnderi qaýipti tustarda sý jolyn bógeý úshin 24 060 qapshyq qum tóselgen.
Tıisti mekemeler óńirdegi sý qoımalarynyń jaǵdaıyn qatań baqylaýǵa alǵanyn málimdedi. Naýryzdyń 14-indegi málimet boıynsha Kóshim ózeni boıyndaǵy Kırov sý qoımasy – 51,8, Bitik – 16,35, Dóńgelek – 32,28, Pıatımar qoımasy 83,48 paıyz sýǵa tolǵan. Shaǵan ózenindegi toǵannyń tolymdylyǵy 75,81 paıyz. Sondaı-aq Varfolomeı sý qoımasy – 88,5%, Saryózen boıyndaǵy I Qaztalov – 66,94%, II Qaztalov – 60,08%, Mamaı qoımasy 66% paıyz sýǵa toly. Aqkól (Balyqty Sakryl) – 57,67%, Saryshyǵanaq kóli 75,94% paıyz kemerine kelip tur eken.
«Aıta keteıik, óńirdegi eń úlken sý arterııasy – Jaıyq ózeninde áli muz buzylǵan joq. Ol ádette sáýir-mamyr aılarynda tasıdy. Bıylǵy kún raıyna qaraǵanda Jaıyq erte tasýy, sý mólsheri jyldaǵydan kóp bolýy múmkin», deıdi Qazgıdromet mamandary. Qazir jergilikti bılik oryndary saıajaı aýmaǵynda turatyn halyqqa yqtımal qaýipti eskertip, jadynama taratyp jatyr.
Batys Qazaqstan oblysy
