Prezıdent sottalǵandardyń quqyǵyn keńeıtý týraly zańǵa qol qoıdy

Memleket basshysy «Qazaqstan Respýblıkasynyń keıbir zańnamalyq aktilerine qylmystyq sot isin júrgizý salasyndaǵy adam quqyqtary, jazany oryndaý, sondaı-aq azaptaý men basqa da qatygez, adamgershilikke jatpaıtyn nemese qadir-qasıetti qorlaıtyn qarym-qatynas túrleriniń aldyn alý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń zańyna qol qoıdy.

Zańnyń mátini baspasózde jarııalanady.

Sonymen qatar Qasym-Jomart Toqaev azaptaý men basqa da qatygez, adamgershilikke jatpaıtyn nemese qadir-qasıetti qorlaıtyn qarym-qatynas túrleriniń aldyn alý jáne sottalǵan adamdardyń quqyǵyn keńeıtý týraly zańǵa qol qoıǵan.

Bul zań – elimizde júrgizilip jatqan saıası jáne quqyqtyq reformalar aıasynda Qazaqstannyń azaptaý men qorlaýdyń basqa da túrlerin joıýǵa, osy másele boıynsha halyqaralyq normalardy ulttyq zańnamaǵa engizýge, sondaı-aq sottalǵandardyń quqyǵyn keńeıtip, túrmedegi teris sýbmádenıettiń qalyptasýyna jol bermeýge baǵyttalǵan júıeli qadamdardyń jalǵasy.

Atap aıtqanda, qujatta mynadaı normalar qarastyrylǵan:

qatygez nemese adamnyń qadir-qasıetin qorlaıtyn qarym-qatynas úshin jaýapkershilik qarastyrylady;

azaptaý úshin qylmystyq jaýapkershilikke tartý sharalary qatańdatylady;

zańsyz áreketterdiń aldyn alý úshin tergeý amaldary kezinde aýdıo jáne beıne taspalaý júıesin qoldaný múmkindikteri keńeıtiledi.

Sonymen qatar Zań sottalǵan adamdarǵa birqatar qosymsha quqyq beredi:

Aýyr syrqatqa shaldyqqan jaǵdaıda olarǵa jazany óteý merzimin keıinge qaldyrý quqyǵy beriledi, ıaǵnı sottalǵan adamǵa medısınalyq mekemede shuǵyl em alýǵa múmkindik týady;

Sottalǵan adamdy aýyr dertke shaldyǵýyna baılanysty jazasyn óteýden bosatý týraly sot sheshimi dereý oryndalady (buryn sottalǵandar sottyń sheshimi zańdyq kúshine engennen keıin ǵana bosatylatyn);

Sottalǵan áıelder men olardyń balalary arasyndaǵy áleýmettik baılanysty saqtaý úshin olarǵa óz balalaryn kolonııada qaldyrýǵa ruqsat etý merzimi 3 jyldan 4 jylǵa uzartyldy;

Buryn sottalǵan adamdardyń birinshi ret isti bolǵan azamattarǵa teris yqpal etýine jol bermeý úshin sottalǵandardy qylmystyq-atqarý júıesindegi mekemelerge bólý tásilderi ózgeredi. Endi birinshi ret sottalǵandar bas bostandyǵynan aıyrý jazasyn buryn sottalǵandardan bólek jerde óteıdi. Bul zańǵa baǵynýshylyq minez-qulyq qalyptastyrýǵa múmkindik beredi. Jalpy zańnamalyq aktilerge engizilgen ózgerister adam quqyqtaryn saqtaýǵa beriletin kepildikterdi arttyrady. Sonymen qatar qaýipsizdik sharalaryn kúsheıtý, olardyń túzelýine jáne qoǵamǵa beıimdelýine múmkindik jasaý arqyly sottalǵan adamdardyń túrmedegi jaǵdaıyn jaqsartýdy kózdeıdi.