Elorda jastary arasynda «Naýryz aıtys» ótti

Astana qalasynyń ákimdigi Tilderdi damytý jáne arhıv isi basqarmasy elorda jastary arasynda «Naýryz aıtys» atty jas aqyndar arasyndaǵy óner saıysyn uıymdastyrdy.

Is-shara L.Gýmılev atyndaǵy EUÝ ǵımaratynda ótti. Qalanyń joǵary oqý oryndary men mektepterinen 14 pen 23 jas aralyǵyndaǵy tańdaýly 10 aqyn sahnada sóz saıystyryp, baq synady.

«Naýryz - qazaqtyń tól meıramy. Bul is-shara merekeniń qarsańynda qazaqtyń asyl óneri aıtysty jastardyń arasynda nasıhattaý maqsatynda uıymdastyrylyp otyr. Aıtystyń etnografııalyq tarıhyn alyp qaraıtyn bolsaq, qaıym aıtys, bádik aıtys, qyz ben jigittiń aıtysy, óli men tiriniń aıtysy nemese ótirik óleń aıtysy sııaqty túrleri bar. Biraq aıtystyń túrleri baryn bile bermeımiz. Endi osyny jastardyń arasynda nasıhattaý maqsatynda búgin osy zalǵa jınalyp otyrmyz», dedi Astana qalasy Tilderdi damytý jáne arhıv isi basqarmasynyń basshysy Sáken Esirkep.

Aıtysty belgili aqyn, fılologııa ǵylymdarynyń kandıdaty Serikzat Dúısenǵazy júrgizdi.

Jas aqyndardyń ónerin baǵalaǵan qazylar alqasynyń quramy ǵalymdar, aıtysker aqyndar jáne jýrnalısterden jasaqtaldy.  Olardyń qatarynda, Qaırat Saq, Balǵynbek Imashev, Erkebulan Qaınazarov, Iranǵaıyp Kúzembaev, Janjigit Omarhan boldy.

Jas aqyndardyń jan-jaqty bilimdiligi, aıtylǵan oı-pikirdiń ushqyrlyǵy, taqyryptyń ashylýy, qarsylasyna tabanasty utymdy jaýap qaıtaryp toıtarys berýi,  sahnadaǵy mádenıeti, sózge toqtaýy t.b. sheberligi synaldy. Aıtyskerlerdiń ónerine 10 baldyq júıede baǵa berildi, ár jupqa 15-20 mınýt ýaqyt bólindi.

Qazylar alqasynyń sheshimimen bas júlde men 1-oryn biriktirilip eki birinshi oryn «Qaıym aıtystyń» úlgisin kórsetken Bek Shymat pen  №86 mektep-gımnazııasynyń 10 synyp oqýshysy Naýat Jaqataevaǵa buıyrdy. Júldeli 2-oryn Eldar Ámirhan men Tamasha Rahatqyzyna, 3-oryn Ǵalym Erkinbek pen Aıym Asylbekqyzynyń qanjyǵasyna baılandy.

I oryn (ekeý) – 250 000 teńgeden, II oryn (ekeý) – 150 000 teńgeden, III oryn (ekeý) 100 myń teńgeden jáne qalǵan qatysýshylarǵa 50 000 myń teńgeden aqshalaı syılyq pen dıplomdar tabys etildi.

Joǵary deńgeıde ótken sóz barymtasyn qorytyndylaǵan uıymdastyrýshylar, jastar arasynda qazaqı qundylyqtardy nasıhattaýdyń jańa joldaryn únemi izdenip, tól ónerimizdiń naqyshyn buzbaı zamanaýı kelbetin qalyptastyra berýimiz kerek dep oı túıdi.