Ekonomıka • 18 Naýryz, 2023

Ulybrıtanııa men Qazaqstan arasyndaǵy taýar aınalymy 1,8 mlrd dollardan asty

Qazaqstan Premer-mınıstri Álıhan Smaıylov Astanaǵa alǵashqy resmı saparmen kelgen Ulybrıtanııa jáne Soltústik Irlandııa Birikken Koroldiginiń Syrtqy ister, dostastyq jáne damý isteri jónindegi mınıstri Djeıms Kleverlımen kezdesý ótkizdi, dep habarlaıdy Egemen.kz Úkimettiń baspasóz qyzmetine silteme jasap.

Aıana TOǴANBEK

О́tken jyly elder arasyndaǵy taýar aınalymy shamamen 60%-ǵa ósip, 1,8 mlrd dollardan asty.

Sondaı-aq Birikken Koroldik Qazaqstannyń TOP-10 ınvestorynyń qataryna kiredi: 2005 jyldan bastap respýblıkaǵa shamamen $16,5 mlrd tikeleı ınvestısııa salyndy. Oń ósý úrdisi sońǵy jyldary da jalǵasyp jatyr.

«Qazaqstan Úkimeti Ulybrıtanııamen barlyq baǵyttar boıynsha ózara is-qımyldy odan ári tereńdetýge nıetti. Bul turǵyda Strategııalyq seriktestik pen yntymaqtastyq týraly Qazaqstan-Brıtan kelisimin qabyldaý mańyzdy qadam bolmaq», dedi Álıhan Smaıylov.

Ol ózara saýdany keńeıtý aıasynda Qazaqstan Ulybrıtanııaǵa 100-den astam taýar pozısııasy boıynsha $800 mln-ǵa jýyq somaǵa ónim eksportyn ulǵaıtýǵa daıyn ekenin aıtty. Bul rette energetıka boıynsha «jasyl» sýtegi óndirý jónindegi birlesken jobalardy iske asyrý, al logıstıkalyq salada – Transkaspıı halyqaralyq kólik baǵytyn odan ári damytý qyzyǵýshylyq týdyrady.

О́z kezeginde Djeıms Kleverlı Qazaqstan Ulybrıtanııanyń Ortalyq Azııadaǵy mańyzdy saýda seriktesteriniń biri ári Birikken Koroldik elimizben barlyq ózara tıimdi baǵyt boıynsha yntymaqtastyqty nyǵaıtýǵa daıyn ekenin atap ótti.

«Ulybrıtanııa men Qazaqstan ornyqty ári berik qarym-qatynastyń negizin qalady, meniń oıymsha, ol barynsha damý áleýetine ıe. Bul bizge aldaǵy qadamdarymyzdy, keleshekte qandaı perspektıvalar ashylatynyn talqylaýǵa múmkindik beredi», dedi Djeıms Kleverlı.

Kezdesý qorytyndysy boıynsha QR Premer-mınıstriniń qatysýymen Qazaqstan men Ulybrıtanııa arasyndaǵy ekologııalyq taza sýtegi men asa mańyzdy mıneraldy shıkizat damytý salasyndaǵy strategııalyq áriptestik týraly memorandýmdarǵa qol qoıyldy.

Ulybrıtanııa – Qazaqstannyń Eýropa qurlyǵyndaǵy negizgi saýda jáne ınvestısııalyq seriktesteriniń biri.