Keı azamattar densaýlyǵyna baılanysty úıden daýys berýdi qalasa, saǵat 12.00-ge deıin tıisti saılaý ýchaskesine habarlasyp, ótinish qaldyra alady. Mundaı jaǵdaıda komıssııa ókilderi turǵynnyń úıine bıýlletenderdi alyp barady. Turaqty tirkeýi joq azamattarǵa Pavlodar, Ekibastuz jáne Aqsý qalalaryndaǵy 6 saılaý ýchaskesinde bir kúnge tirkelip, tańdaýyn jasaýǵa múmkindik bar. Búgin atalǵan úsh qaladaǵy qoǵamdyq kólikter jolaýshylardy tegin tasymaldaıdy. Sondaı-aq ınvataksıler tegin qyzmet kórsetedi.
Caılaý ýchaskelerinde daýys berýshilerge birden bes bıýlleten berilip jatyr. Bul rette kógildir tústi bıýlleten arqyly Májiliske ótýi kerek partııany tańdaısyz. Oǵan eldegi jeti partııa usynylyp otyr. Májiliske birmandattyq saılaý ýchaskesi aıasynda usynylǵan kandıdattardyń birin belgileý úshin jasyl tústi bıýlleten beriledi.
Bıýlletende bizdiń óńirden tirkelgen 11 úmitkerdiń esimi bolady. Oblystyq máslıhat depýtattaryn partııalyq tizim boıynsha saılaý bıýlletenderi qyzǵylt, birmandattyq saılaý okrýgteri boıynsha sarǵysh tústi bolady. Oblystyq máslıhattaǵy mandattarǵa da jeti partııa «talasady». Birmandattyq okrýg aıasynda 51 kandıdat saılaýǵa túsedi. Al aýdandyq jáne qalalyq máslıhattardyń depýtaty atanýdan úmitti azamattardyń esimderi sur tústi bıýlletende jazylady. Qalalyq máslıhat depýtattyǵyna - 173, aýdandyq máslıhat depýtattyǵyna 346 kandıdat tirkelgen.
