Qyzdardyń qarqyny qatty

Úndistanda osymen úshinshi márte jalaýy jelbiregen álem­dik dodanyń alǵashqy kúninde Shámil Safıýllın jattyqty­ra­tyn Qazaq­­stan qyzdar qura­masy sapynan birinshi bolyp rıngke 52 kılo salmaqta óner kórsetetin Jazıra Oraqbaeva kóterildi. Byltyrǵy Azııa birinshiliginiń qola júldegeri Delı sharshy ala­ńyndaǵy birinshi jekpe-je­ginde taıpeılik Chan Chıa-Hsýn­men ju­dyryqtasty. Báse­ke bas­­talǵan bette rıng orta­syn ıelenip, qar­sylasyn soq­qy­nyń astyna alǵan otandasymyz ekinshi raýnda taıvandyq qar­sylasyn eki márte nok­daýnǵa ji­­berip, keıin­nen jek­pe-jekti no­kaýtpen aıaq­tady.

Álem chempıonatynyń ekinshi kúninde Qazaqstan jankúıerleri eki otandasymyzdyń jekpe-jekterin tamashalady. 60 kılo salmaqta judyryqtasatyn otandasymyz Rımma Volosenko «á» degennen myqty qarsylasqa tap boldy. Ol alǵashqy aınalymda ózbekstandyq eki dúr­kin Azııa chempıony Sıtora Týrdı­bekovamen qolǵap túıistirdi. Eki myqty arasyndaǵy kezdesýdi Delıdegi sport keshenine jı­nal­ǵan jankúıerler asqan qy­zy­ǵýshylyqpen tamashalady. О́ıtkeni eki boksshy da úsh raýnd boıy bir qarys artqa sheginbeı, sharshy alańda jeńis úshin bar ónerlerin ortaǵa saldy. Asa tar­tysty ótken jekpe-jekte tó­re­shiler Qazaqstan boksshysy bir bas joǵary nátıje kórsetti dep eseptep, 4-1 esebimen je­ńis­ti Rımma Volosenkoǵa berdi. Rım­­ma ekinshi aınalymda ser­bııa­lyq Natalıa Shadrınamen ju­dy­ryqtasady.

Volosenkonyń izin ala rıngke jaraqatyna baılanysty uzaq ýaqyt ulttyq qurama qatarynan shyǵyp qalǵan 81 kılodaǵy Fa­rıza Sholtaı kóterildi. Byl­tyr­ǵy el chempıonatynda óz myq­­­ty­lyǵyn dáleldep, quramaǵa qaıta oralǵan aýyr salmaqtaǵy jer­­lesimiz birinshi kezdesýinde Trı­nıdad jáne Tobago ókili Lıan Býdrammen kezdesip, teh­nıkalyq nokaýtpen jeńiske jetti. Farıza shırek fınalda kenııalyq Elı­zabet Adıambo Andıegomen kúsh synasady.

Úndistandaǵy jarystyń úshin­­­shi kúninde úsh qazaqstandyq boksshy sharshy alańǵa shyǵyp, barlyǵy da qarsylastarynan basym tústi. Atap aıtqanda, jeńil salmaqta (48 kg) judyryqtasatyn Alýa Balqybekova álem chem­pıo­natynyń 1/16 kezeńinde sın­gapýrlyq Keı Van Chı Vaımen sheberlik baıqasyp, qarsylasyn aı­qyn basymdyqpen tize búk­tirdi – 5:0. Ol kelesi aınalym­da Reseı boksshysy Iýlııa Chým­galakovamen kezdesedi. Aıta ke­teıik, Alýa Balqybekova byltyr Ystanbuldaǵy álem chem­pıo­natynda kúmis júldege qol jetkizgen bolatyn.

Sondaı-aq Olımpıada baǵ­dar­­lamasyna enetin 54 jáne 66 kılodaǵy Jaına Shekerbekova men Nadejda Rıabes álem birin­shiligin sátti bastap, dodanyń ke­­lesi kezeńine joldama aldy. Úsh dúrkin álem chempıonatynyń júl­degeri Jaına Shekerbekova al­ǵashqy aınalymda Ońtústik Koreıa ókili E Chjı Imdi jarys jolynan yǵystyrsa, jas­tar ara­syndaǵy Olımpııa oıyn­da­rynyń qola júldegeri, eresekter arasyndaǵy Tokıo Olımpıa­dasynyń qatysýshysy Nadejda Rıabes te birinshi kezeńde Ońtús­tik Koreıa boksshysy Sıon Sýd­jınnen tóreshilerdiń aralas she­shimimen basym tústi.

Aıta keteıik, bıylǵy qyz­dar arasyndaǵy álem chempıo­natynyń júlde qory qomaq­ty. Máselen, jarys jeńim­pa­­zy atan­ǵan boksshylar Ha­lyq­ara­lyq boks qa­ýym­das­ty­ǵynan – 100 myń, kúmis medal ıegerleri – 50 myń, qola júl­degerler 25 myń AQSh dol­lary kó­leminde syıaqy alady.