Jalaǵashtyqtar da bıylǵy merekede kenttegi Rámizder alańyn abattandyryp, Temirbek Júrgenovtiń 125 jyldyǵyna baılanysty qaıratker esimin ıelengen eldi mekendegi alleıaǵa 125 kóshet otyrǵyzdy.
Qyzylorda qalasynda da «Naýryz naqyshy – tazalyq» atty kórkeıtý-kógaldandyrý sharasy sheńberinde zııaly qaýym ókilderiniń qatysýymen kóshet otyrǵyzylyp, qalany abattandyrýǵa baǵyttalǵan is bastaý aldy.
Shıelilikter kórkeıtýdiń qamyna aqpannyń sońyn ala kirisip ketipti. Shıeli kentiniń irgesinen ótetin «Shymkent-Samara» kúre joly boıyndaǵy 3,6 gektar aýmaqqa sharýa qojalyqtarynyń demeýshiligimen 3700-den asa kóshet egilip, 6,4 shaqyrym aýmaq qorshaldy. Aýdan ortalyǵyndaǵy I.Ábdikárimov, Iаsaýı kósheleriniń boıyndaǵy 7,1 gektar jerge óndiris oryndary, mekemeler jumysshylary men turǵyndar jumylyp 9 450 kóshet otyrǵyzdy.
Osylaısha, bıyl aýdanda 24 000 túp egilýi josparlanǵanmen, naqty otyrǵyzylǵany 40 myńnyń ústine shyǵady. Kóbine sý tapshylyǵynan egilgen shybyq jelekke aınalmaı jatyp qýrap qalatyny bar. Osydan da aýdanda jańa egilgen aýmaqtar úshin aryqpen keletin aıaqsýdan bólek, arnaıy 4 uńǵyma qazyldy.
Kóptiń isi kórkeıtýge úlken úles qosyp júrgen jandar da jeterlik. Kóshet otyrǵyzyp, kóktemniń sánin kirgizetin sondaı sátti asyǵa kútetinderdiń biri – Qyzylorda qalasynyń turǵyny Bektaı Súleımenov aqsaqal. Bul kásipti on eki jasynan ıgergen baǵban osyǵan deıin orta eseppen 2 mln túp aǵash egipti.
Túrkistan oblysyndaǵy Shardara óńirinde dúnıege kelip, Qazaq aýyl sharýashylyǵy ınstıtýtyn bitirgennen keıingi eńbek jolyn ataqonysy Syrdan bastaǵan ol oblystyń birqatar aýdanynda qyzmet etti. Toqsanynshy jyldary Qyzylorda qalasynyń irgesinen jer alyp, túrli aǵash ege bastady.
«Qyzylordanyń sor topyraǵyna ekken aǵash ónbeıdi» deıtinder kóp. Bul – jańsaq pikir. Qazir baqta jemis aǵashynyń, basqa taldardyń jıyrmadan astam túri bar. On bir jyl buryn otyrǵyzǵan qylqan japyraqtylar qazir 5 metrge deıin ósti. Tipti anar aǵashynan jemis alyp otyrmyn. Tek tásilin bilý kerek», deıdi B.Súleımenov.
Qazir 4 gektar jerge 2 myńnan astam aǵash otyrǵyzǵan baǵban ekkenin kádimgi sorǵy qondyrǵysymen-aq sýaryp otyr. Osydan biraz buryn sharýasyna qoldaý izdep tıisti oryndardy jaǵalaǵan eken. Múmkindigi bolsa, sýbsıdııa alyp, baq aýmaǵyn keńeıtkisi de kelgen. Biraq «sizdiń jerińiz sý basý qaýpi joǵary aýmaqta ornalasqandyqtan, qoldaýǵa jatpaıdy» degen jaýaptan keıin oıyndaǵysynyń oryndala qoımaıtynyna kózi jetti. Osy jerge alǵashqy kóshet tikken 32 jyldan beri ondaı qaýipti baıqamaǵan qarııa bárinen buryn osy sózge qaıran qalady.
«Qazir jemisterden alma, almurt, sary órik, tipti anar da ósirip otyrmyn. Bizde kóbine kóshetti syrttan tasyp, ol jergilikti topyraqty jersinbeı, eńbekti esh etip jatady. Jergilikti jerden qoldaý bolsa, Syr topyraǵyna beıim jemis aǵashtary men taldar egilgen aýmaqty ulǵaıta túser edim», deıdi qart baǵban.
Kóktem sáni – kóshet. Ár aýlada qorshaǵan ortany kórkeıtýdiń qareketi baıqalady.
Qyzylorda
