«Meniń oıymsha, ýnıversıtet árqashan qoǵamǵa qyzmet etýi qajet. Sáıkesinshe onyń ishindegi materıaldyq qundylyqtar da sol mıssııaǵa saı bolýy tıisti. Mysaly, qazirgi gadjetter men ınternet belsendiliginiń zamanynda keıbir túsinikter boıynsha kitap oqý degenińiz ol sondaı qıyn jumys retinde kórsetiledi. Al shyn máninde, biz kitap oqýdy sánge aınaldyra bilýimiz kerek. Kitap oqýdyń nasıhatymen aınalysýǵa bar kúsh jigerimizdi salýymyz qajet. Iаǵnı kitaphana maqsaty qoǵamdaǵy kitap oqýǵa degen qushtarlyqty oıatyp, kitapqa degen qurmetti arttyrýǵa arnalǵan orta bolǵany durys. Bul aımaq ınnovasııalyq ıdeıalardy talqylaýǵa, bilimge shabyttandyratyn taptyrmas múmkindik bolady degen úmittemiz», – dedi Maqsyt Narikbayev University basqarma tóraǵasy Talǵat Nárikbaev.
Jalpy, joǵary oqý ornyndaǵy qoǵamdyq kitaphana degen jańa uǵym emes. Mysaly, New York University, Harvard, Stanford sııaqty álemniń jetekshi ýnıversıtetterinde qoǵamnyń qoldanýyna usynylǵan kitaphanalar bar.
Public Library qorynyń syıymdylyǵy 13 myń kitapqa deıin jetedi. Birinshi zalda qazaq tilindegi ádebıetter, qazaq avtorlary, álemdik bestsellerlerdiń qazaq tilindegi aýdarmalary, sondaı-aq Qazaqstan týraly shet tilderindegi ádebıetter ornalasqan. Keıingi zaldarda bıznes, kóshbasshylyq, strategııa, menedjment, komanda qurylymy, adam resýrstaryn basqarý, koýchıng, qarjy, qarjylyq saýattylyq jáne ınvestısııa týraly týyndylar bar. Sondaı-aq bıznes-ıdeıalardy qalaı tekserý kerek, startaptardy qalaı bastaý kerek degen sııaqty, ıaǵnı barlyǵy bolashaq jáne qazirgi kásipkerler men menedjerlerge arnalǵan kitaptardy taba alasyz. Tarıh, áleýmettaný, mádenıet, óner boıynsha da tanymdyq ádebıetter bar.
«Fılosofııa» bóliminde antıkalyq fılosofııadan, klassıkalyq nemis tilinen anarhızm ilimine deıin keń aýqymdy fılosoftardyń kitaptary usynylǵan. Sonymen qatar klassıkalyq kórkem ádebıet týyndylary, pýblısıstıka, ǵalam, ǵarysh, jaratylystaný týraly ǵylymı-kópshilik basylymdar jáne serııalyq basylymdar. Densaýlyq, durys tamaqtaný jáne dene týraly ádebıetter, psıhologııa boıynsha ádebıettermen qatar, munda jastarǵa arnalǵan ózin ózi taný, psıhıkalyq densaýlyq jáne rýhanı damý týraly kóptegen tanymal kitap bar.
«Jalpy, kitap adamnyń ishki dúnıesin baıytyp, oı-órisin keńeıtip, muqtajyn qanaǵattandyratyn rýhanı azyǵy bolyp qala bermek. Al qoǵamnyń ál-aýqaty, damý deńgeıi bilimge tikeleı baılanysty. Qazirgi saıası-ekonomıkalyq jarysta kósh bastap, álemdik arenada jetekshi oryn alý úshin qoǵamǵa rýhanı jańǵyrtatyn, bilim men ǵylymǵa qolaıly orta usyný kerek», – deıdi Talǵat Nárikbaev.
Qoǵamdyq kitaphananyń ashylý saltanaty «Astana» Halyqaralyq qarjy ortalyǵynyń sot ókilderi men Halyqaralyq tórelik ortalyǵynyń qazirgi tóraǵasy Tomas Krıýmmel myrzanyń jáne burynǵy tóraǵasy Barbara Domann hanymnyń resmı sapary aıasynda ótkizildi.
Jıyn sońynda Qazaqstanǵa alǵash ret resmı saparmen kelgen Tomas Krıýmmel IAC-taǵy kommersııalyq daýlardy sheshý úshin arbıtrajdyń artyqshylyqtary týraly aıtyp berdi. Al Domann hanym 2022 jylǵy Halyqaralyq tórelik ortalyǵynyń tórelik jáne medıasııa erejeleriniń novellalary týraly tyńdaýshylarymen bólisti.
Public Library kitaphanasy Maqsyt Narikbayev University-diń negizgi kireberisindegi holda ornalasqan. Oǵan kez kelgen Astana qalasynyń turǵyndary men qonaqtary kelip, rýhanı kókjıegin keńeıtip, tanymyn baıyta alady.
