Jalpy, Shyǵys Qazaqstan oblysynda týrıstik salany damytýdyń joǵary áleýeti bar. Bul aımaq tabıǵattyń erekshe sulýlyǵymen týrısterdi ózine tarta alatyny belgili. Sondaı-aq týrızmniń barlyq túrin damytýǵa múmkindik beretin landshafttyń kez kelgen túrin keziktire alasyz. Árıne, olardyń ishinde Alakól kýrortty aımaǵynyń jóni bólek.
Joǵaryda atap ótkenimizdeı, byltyr Alakólge kelýshilerdiń sany 200 myńnan asqan bolsa, bıyl bul kórsetkish aıtarlyqtaı artýy múmkin. Sebebi, bıyl Alakól kóline aparatyn byltyrǵy poıyz jolynyń barlyq baǵyty saqtalady. Sonymen qatar Alakólge alǵash ret «Astana – Dostyq» baǵyty boıynsha «Talgo» poıyzyn qosý josparlanyp otyr. Bul týraly jýyrda «Atameken» UKP alańynda ótken jazǵy maýsymda jolaýshylar tasymalyn qamtamasyz etý máseleleri jónindegi keńesinde aıtyldy. Jıynǵa «Qazaqstan temir joly» UK» AQ, «Jolaýshylar tasymaly» AQ jáne týrıstik fırmalar men salalyq qaýymdastyqtar arasynan jumys tobynyń ókilderi qatysty.
– 2023 jyly Alakól baǵytynda Astana, Almaty, Shyǵys Qazaqstan jáne Abaı oblystarynan 11 marshrýt boıynsha júrý jalǵasyn tabady. Týrısterge yńǵaıly bolý úshin alǵash ret «Astana-Dostyq» baǵyty boıynsha «Talgo» poıyzy iske qosylady. Týrıstik bıznes ókilderi Astanadan Alakól kóline deıingi vagondarǵa qajettilik baryn aıtyp, «Talgo» formatyndaǵy júrdek poıyzdy uıymdastyrýdy surady. О́tken jyly barlyǵy kólge qaraı 11 baǵyt uıymdastyrdyq. Sonyń ishinde 3 baǵyt Astanadan, 5 baǵyt Almatydan, 2 baǵyt ShQO men Abaı oblysynan boldy, dedi «Jolaýshylar tasymaly» AQ bas dırektory Jánibek Taıjanov.
Byltyr Alakól jaǵalaýyna temirjol kóligimen 243 myń jolaýshy jetkizilgen. Elimiz boıynsha eń kóp suranys elimizdiń ońtústik aımaǵynan túsken. Atap aıtqanda, 2022 jyly ońtústikten Alakólge 118 myń adam barǵan. Soltústik aımaqtan 72 myń jolaýshy tasymaldansa, ShQO-dan – 52 myń. 2023 jyly jolaýshylar oryndarynyń sanyn 6%, ıaǵnı 276 myńǵa deıin ulǵaıtý josparlanǵan. Bul – ótken jylmen salystyrǵanda 6%-ǵa nemese 16 myń orynǵa artyq kórsetkish.
Sonymen qatar týroperatorlar úshin týrısterdi tasymaldaýdy qamtamasyz etý maqsatynda poıyz jóneltilgenge deıin 180 táýlikten bastap kommersııalyq poıyzdarǵa bıletterdi erte brondaý tártibi qoldanyla bastaıdy.
«Atameken» UKP basqarma tóraǵasynyń birinshi orynbasary Maqsat Qıqymov 2022 jyly birqatar másele sheshilgenine qaramastan, bızneste áli de problemalar bar ekenin atap ótti. Negizinen týrıstik naryq vagondardyń sapasy, aýa baptaǵysh júıesimen jabdyqtaýdyń bolmaýyna qatysty shaǵym aıtqan. Jolaýshylar poıyzdary boıynsha vagon parkin jańartý, týrıstik klastaǵy poıyzdardy qalyptastyrýǵa qajettilik bar.
«Alakóldiń shyǵys jaǵalaýyna deıingi avtojoldar áli de jóndelip jatyr. Áýe bıletteriniń joǵary baǵa saıasatyn jáne áýe reısteriniń shekteýli sanyn eskersek, týrıster úshin eń ońtaıly qozǵalys tásili – temirjol qatynasy bolyp qala beredi. Kóliktiń bul túrine suranystyń artýyna baılanysty jyldan jylǵa baǵyttar sanyn kóbeıtýdi qajet etedi», dedi Maqsat Qıqymov.
Qazaqstan týrızm ındýstrııasy qaýymdastyǵynyń tóraıymy Mýnıram Ahmetova týrbıznes atynan «QTJ» UK» AQ tarapynan sheshýdi talap etetin birqatar máseleni usyndy.
«Alakól kóline jolaýshylardy tasymaldaýdy qamtamasyz etýdi jaqsartý jónindegi máselelerdiń ishinde mynalardy erekshe atap ótkim keledi: poıyz qozǵalysynyń kestesin ońtaılandyrý, eski vagondardy jaqsartý, aýystyrý jáne kondısıonerlermen jabdyqtaý jónindegi jumysty jalǵastyrý, Shymkent jáne Pavlodar qalalarynan Alakólge, stansaǵa nemese kentterge reısterdi jalǵastyrý, bılet satý boıynsha kassa uıymdastyrý», dep atap ótti Mýnıram Ahmetova.
Týrızm departamentiniń basqarýshy dırektory Damılıa Qunanova ótken jyly týroperatorlar úshin erte brondaý qaǵıdalaryn bekitý boıynsha jumys tájirıbesin eskere otyryp, ıntermodaldy tasymaldaýdy damytý jónindegi jumys tobyn qurýdy usyndy.
Bul usynysty «Jolaýshylar tasymaly» AQ qoldap, aldaǵy ýaqytta Shymkent, Pavlodar, О́skemen, Qyzylorda qalalarynan jergilikti ákimdikter, avıa jáne avtobýs uıymdarymen birlesip ıntermodaldyq tasymaldardy qalyptastyrý jónindegi jobalar qaralatynyn habarlady.
Sonymen qatar Jánibek Taıjanov «Jolaýshylar tasymaly» AQ ákimdiktermen, áýe kompanııalarymen jáne avtotasymaldaýshylarmen birlesip Shymkent, Pavlodar, О́skemen, Qyzylorda qalalarynan Alakól baǵytynda ıntermodaldy tasymaldaýdy (kóliktiń eki nemese odan da kóp túrimen tasymaldaý) qalyptastyrý máselesin qaraıtynyn atap ótti.
Jıyndy qorytyndylaı kele, «Jolaýshylar tasymaly» AQ bas dırektory týrısterdi tasymaldaýdy qamtamasyz etý boıynsha birlesken jumysqa belsendi qatysqany úshin qatysýshylarǵa alǵysyn bildirdi, sondaı-aq barlyq aıtylǵan másele men usynystar kompanııanyń baqylaýynda bolatynyna sendirdi.
