Aımaqtar • 26 Naýryz, 2023

Kók teńizge kóz tikken

251 ret kórsetildi

1994 jyly kúzde Aqmola oblysy, Birjan sal aýdany, Qudyqaǵash aýylynda ómirge kelgen Qýanyshbek úlken ómir joly kók te­ńizdiń tolqyndarymen alys­qan teńizshi bolýǵa bas­­taıtynyn, Otanǵa, elge degen jaýapty, salmaqty per­zenttik qyzmetin Kaspıı te­ńizinde atqaratynyn bil­gen joq.

Jany óleńge, ádebıetke qushtar aýyl balasy 2-synyp bitirgen jyly Astana qalasyna kelgende áskerı kıim kıgen óndirdeı órenderdi kórgen sátten-aq, áskerı kıimge degen qyzyǵýshylyǵy oıandy. Oqaly kıim kıip, sapta symdaı tartylǵan soldat bolýdy jıi armandaıtyn boldy. Bala qııalyn terbegen osy arman Qýanyshbekti 2005 jyly Armııa generaly, Halyq qaharmany, táýelsiz eli­mizdiń tuńǵysh Qorǵanys mınıstri Saǵadat Nurmaǵanbetov atyndaǵy respýblıkalyq «Jas ulan» mek­tebine alyp keldi. Atalǵan mektepte tórt jyl oqyp áskerı ómirdiń álippesin úırengen soń, 2009 jyl­dyń qyrkúıek aıynan bastap bi­limin Túrkııa Respýblıkasynyń Ystanbul qalasyndaǵy Áskerı-te­ńiz lıseıinde jalǵastyrady. Bul lıseıge oqýǵa túsý de ońaı bolǵan joq, Qazaqstannan nebári on orynǵa 180 bala baq synap, arasynan júzden júırik shyq­qandar ǵana joldama aldy. Ás­kerı ómirge qyzyǵýshylyǵy jo­­­ǵary, sabaqta úzdik oqyǵan Qýa­­­nyshbektiń baǵy jandy – ol qıyn synaqtardan súrinbeı ótip iriktelgen on bozbalanyń biri bolyp Túrkııaǵa jol tartty. Súıik­ti ata-anasy 2003 jyly Qýa­nysh­bek toǵyz jasqa kelgende jol apatynan qaıtys bolǵan edi, eki qamqor-tireginen bir kúnde aırylǵan Qýanyshbek jalǵyz inisin elde aǵaıyn-týys arasyna qaldyryp azamat bolýdyń jolyna tústi. Bes jyl lıseıde, bir jyl túrik tilin úırený kýrsynda – barlyǵy alty jyl bilim alǵan Qýanyshbek Dıýsembaev 2015 jyly atalǵan lıseı­di jaqsy kórsetkishpen aıaq­taǵan soń Ystanbuldaǵy Áske­rı-teńiz akademııasyna qabyldanady.

Akademııada áskerı ómirdiń naǵyz qyzyǵy men qıyndyǵyn kórip jetile túsedi – shyńdalady, shıryǵady. Toǵyz araldy Túr­kııanyń bir aralynda alty jyl meken etken ol Kaspıı teńizin de osy oqýda júrip kóredi. Aldymen shaǵyn parýstarmen, keıinnen úlken kemelermen aıdynǵa shyq­qan jas teńizshi tek Kaspıı emes Eýropa elderin aralaýǵa múm­kindik alady. Oqý barysynda Is­panııa, Portýgalııa,Fransııa, Kıpr, Malta, Italııa elderin aralap, jergilikti halyqtyń tur­mys-tirshiligimen tanysyp, tabı­ǵatyn tamashalady. О́mir kórdi, jer tanyp, eldi qyzyqtady, ózi sııaqty áskerı erlerdiń ortasyna qalyptasty, áskerı qyzmet mek­tebiniń kásibı sheberine aınaldy.

2019 jyly akademııany bitirip leıtenant shenimen Qazaq­stanǵa oralǵan Qýanyshbek Murat­bekuly Qorǵanys mınıstrliginiń jum­saýymen Qazaqstan Respýb­lı­kasy Áskerı-Teńiz kúshteri Aq­taý qala­syndaǵy Áskerı bazasynda 2901 áskerı bólimi qaramaǵyndaǵy 21814 áskerı bólimi ártekti kemeler dıvızıonyna «Oral» zymy­ran ar­tıllerııalyq kemesiniń shtýr­mandyq-jaýyngerlik bó­limi­niń top komandıri bolyp taǵaıyn­da­lady.

– Qyzmetim ózime unaıdy, ás­kerı oqý maǵan el kórýge, jer kórýge mol múmkindik berdi. Osy júris-turystar, izdenister nátı­je­sinde shetel tilderin úıren­genimdi ózime zor qýanysh sanaımyn, qazir qazaq, orys, aǵylshyn jáne túrik tilderinde erkin sóıleı alamyn, al nemis tilin oqydym, biraq jaqsy bilemin dep aıta almaımyn. 2022 jyly qosymsha Ún­distanda alty aı IT kýrsyn oqyp, aqparattyq tehnologııa ofı­seri atandym. Elimizdi damytý, sondaı-aq qyzmettik mindetimizge saı Kas­pıı teńiziniń qazaqstandyq sek­torynyń qaýipsizdigin saqtaý – aza­mattyq jáne áskerı paryzym dep bile­min, barlyq kúsh-jigerimdi osy múddege jumsaımyn, – deıdi ol.

Oqýshy kezinde karatege qa­tysyp, fýtbol oınaýǵa qush­tar bolǵan Qýanyshbektiń óleń ja­zatyn óneri bar eken, tipti óziniń shaǵyn kitapshasy da bolypty. Biraq áskerı ómirdiń temir­deı tártibi, ýaqyttyń jappaı jattyǵýlarǵa arnalýy óleńjandy jigit pen sulý óleń shýmaqtarynyń arasyn alystatyp jiberse kerek. Oqýshy kezinde «Abaı oqýlaryna» qatysyp júldeli oryn alǵan ol «mánerlep oqyǵandy unatamyn» deıdi. «Kitap oqyǵandy qalaıtyn edim, alaıda qazir oǵan múmkindik az. Men áskerı ómirdi tańdaǵanyma ókinbeımin, demek, bul – meniń jolym» deıdi aǵa leıtenant Q.Dıýsembaev. Budan eki jyl bu­ryn «Oral» jaýyngerlik keme­siniń shtýrmandyq-jaýyngerlik bó­liminiń komandıri bolyp ta­ǵaıyndalǵan Qýanyshbek Murat­bek­ulynyń sheni de joǵarylap, ıyǵyna aǵa leıtenant juldyzyn taqty.

Týǵan elge oralǵan soń ózin Túrkııadan on jyl kútken súıikti qyzymen shańyraq kóterdi. Jary Lázzat «memlekettik basqarý isi» mamandyǵy boıynsha ýnıversıtet, magıstratýra bitirgen joǵary bilimdi maman. Qazirgi tańda Aqtaý qalasynda páter jaldap turatyn Qýanyshbek pen Lázzattyń otbasynda kishkentaı qyz bala ósip keledi. Jalǵyz inisi de otbasyly bolǵan, Astana qalasynda turady eken. «Ornynda bar ońalar» degendeı, inisi ekeýi oqysta qaıtys bolǵan ata-anasynyń shańyraǵyn tiktep, urpaq sabaqtastyǵyn jal­ǵastyrýda.

Qýanyshbektiń sózinen shúkir­shilikti, sabyrlylyqty baıqadym. Memlekettiń múddesin jeke bas qa­jettiliginen joǵary qoıý, sheka­ranyń tynyshtyǵyna shúkir etý Qýanyshbek Dıýsembaev syndy jas ofıserlerdiń boıynan tabylǵany qýantady.

 

Mańǵystaý oblysy 

Uqsas jańalyqtar