ASTANA. Maýsymnyń 28-nen 29-na qaraǵan túni álem chempıonatynda Brazılııa – Chılı quramalary arasyndaǵy matchpen 1/8 fınaldyq oıyndar bastaldy. Kezdesýdiń negizgi jáne qosymsha ýaqyty 1:1 esebimen aıaqtalyp, oıynnan keıingi penaltıde brazılııalyqtar 3:2 esebimen jeńiske jetti. Bul týraly egemen.kz habarlady.
28 maýsym. Belý-Orızontı. «Mıneıran» stadıony. Tóreshi - Hovard Ýebb (Anglııa).
Brazılııa - Chılı - 1:1 (1:1, 1:1).
Brazılııa: Jýlıo Sezar, Danı Alves, Tıago Sılva, Davıd Lýıs, Marselo, Lýıs Gýstavo, Fernandıno (Ramıres, 72), Oskar (Vıllıan, 106, Fred (Jo, 64), Neımar, Halk.
Chılı: Klaýdıo Bravo, Eýhenıo Mena, Maýrısıo Isla, Garı Medel (Hose Rohas, 110), Gonsalo Hara, Charlz Arangıs, Fransısko Sılva, Artýro Vıdal (Maýrıso Pınılıa, 87), Marselo Dıas, Edýardo Vargas (Felıpe Gýterres, 57), Aleksıs Sanches.
Goldar: Davıd Lýıs (18), Aleksıs Sanches (32).
Penaltı soqqandar: Davıd Lýıs, Marselo, Charlz Arangıs, Dıas, Neımar,
Penaltı soǵa almaǵandar: Pınılıa (qaqpashy), Vıllıan (janynan), Aleksıs Sanches (qaqpashy), Halk (qaqpashy), Hara (baǵan).
Eskertýler: Halk (56), Jo (94) – Eýhenıo Mena (17), Fransısko Sılva (38), Lýıs Gýstavo (59).
Match Chılı quramasynyń shabýylynan óris aldy. Olar birinshi bolyp aıyp dobyn urý qurmetine de jetti. Biraq odan keıin brazılııalyqtar birtindep tizgindi qolǵa ala bastady. Bul joryqty qaqpashy Jýlıo Sezar uıymdastyrdy. Onyń búkil alań ústimen ushyp kelgen dobyn alýǵa umtylǵan Fred ofsaıdqa túsip qaldy.
Osylaısha pentakampeondar qarsy jaqqa qysymdy kúsheıte tústi. Birinshi taımnyń birinshi shıreginen asa olar chılılikter alańynan shyqpaýǵa aınaldy. Bul kóp uzamaı, 18-mınýtta óziniń nátıjesin berdi. Aldymen Halk urǵan aıyp dobyn Klaýdıo Bravo aýtqa asyrdy. Osydan keıin sol jaq jalaýsha tusynan Neımar buryshtama dobyn berdi. Ol qaqpashy alańyna ushyp jetkende, Tıago Sılva baspen urdy. Sol dop ortaǵa ushyp jetkende, Davıd Lýıs qaqpaǵa solq etkizdi. Gol!
Chılı quramasy da qarap qalmady. Qaqpalaryna dop jiberip alǵannan keıin olar joryqqa shyqty. Osydan keıin alma-kezek shabýylǵa erik berildi. Onyń aýanynda esep teńesti. Bul 31-mınýtta oryn aldy. Ol Edýardo Vargastyń úsh birdeı brazılııalyqty artta qaldyryp, qaptalmen alǵa zymyrap shaǵýynan bastaý aldy. Ol dopty qaqpashy alańyna áýeletip jetkizgende, ony Aleksıs Sanches qabyldap alyp, 10 metr jerden qaqpaǵa jerletip atty – 1:1!
Osydan keıin eki jaqtyń tolassyz tartysy údedi. Biraq Brazılııa fýtbolshylarynyń basymdylyǵy bilinip turdy. Sol joıqyn shapqynshylyq barysynda, 56-mınýtta olar qarsy qaqpaǵa taǵy bir dop túsirdi. Alaıda, alańdaǵy tóreshi Hovard Ýebb ony tánge almaǵany bylaı tursyn, sol goldyń avtory bolǵan Halktyń ózine «sary qaǵaz» kórsetti. Peterbýrgtik shabýylshy dopty keýdesimen qabyldap alǵan edi. Sol kezde qoly denesine jabysyp turǵan. Dopty alǵasyn ol ony qatty uryp, tordan bir-aq shyǵardy. Arbıtr bul sátte onyń qoly dopqa tıdi dep eseptegen sııaqty. О́te kúmándi sheshim qabyldaǵan ol osylaı bir goldy joq etti.
Al 65-mınýtta brazılııalyqtardy zordyń kúshi ǵana goldan qutqaryp qaldy. 74-mınýtta olardyń ózderi gol soǵyp kete jazdady. 82-mınýtta taǵy osyndaı jaǵdaı qaıtalandy. 84-mınýtta Halk taǵy da gol soǵýdyń múmkindigin aldy. Onyń urǵan dobyn Bravo keremet qaıtardy. Osylaı oıynnyń negizgi ýaqyty teń aıaqtaldy.
Qarsylastar qosymsha ýaqytta da kimniń myqty ekenin anyqtaı almady. Onyń sońy penaltıge alyp bardy.
Penaltıdiń qorytyndysymen kelesi kezeńge shyqqan Brazılııa endi Kolýmbııa – Ýrýgvaı quramalarynyń jeńimpazymen kezdesedi.
Damır Qojamqul.
Derekkóz: egemen.kz.
Foto: Sportbox.ru.
