Qoǵam • 27 Naýryz, 2023

Mınıstrlik shetelden ákelingen kólikterdi zańdastyrýǵa qatysty málimdeme jasady

Qazaqstan Respýblıkasy Ishki ister mınıstrligi Ákimshilik polısııa komıtetiniń tóraǵasy Qaısar Sultanbaev vedomstvoda ótken brıfıngte qazaqstandyqtardyń qansha kólikti zańdastyrǵanyn aıtty, dep habarlaıdy Egemen.kz.

Aıana TOǴANBEK

Komıtet basshysynyń aıtýynsha, 2023 jyldyń 23 qańtary men 26 naýryzy aralyǵynda 69 myńnan astam kólik zańdastyrylǵan.

«Onyń 67%-y – 46 592 avtokólik Reseı Federasııasynan, 19%-y – Armenııadan – 13 424 avtokólik, 10%-ǵa jýyǵy – 6 788 avtokólik Qyrǵyzstannan, 2%-ǵa jýyǵy – 1296 avtokólik Grýzııadan ákelingen», dedi Qaısar Sultanbaev.

Ol Ishki ister mınıstrligi de «avtokonstrýktorlar» dep atalatyndardy, ıaǵnı qosalqy bólshekter atyn jamylyp ákelingen kólikterdi zańdastyrýdyń sharttaryn aıqyndaıtyn Úkimet qaýlysynyń jobasyn ázirlegenin aıtty.

«Joba qoǵamdyq talqylaýdan ótti, qazir onyń qorytyndysyn shyǵaryp jatyrmyz, sodan keıin jobany túpkilikti bekitýge memlekettik organdarǵa jiberip, Úkimetke jiberemiz», dedi ol.

Vedomstvo ókili atap ótkendeı, bıylǵy jyldyń 23 qańtarynan bastap Memleket basshysynyń tapsyrmasy boıynsha 2022 jyldyń 1 qyrkúıegine deıin elimizge ákelingen sheteldik avtokólikterdi zańdastyrý jumystary júrgizilip jatyr.

Zańdastyrýǵa ótinishter barlyq halyqqa qyzmet kórsetý ortalyqtarynda, sondaı-aq «elektrondyq úkimet» portalynda azamattarǵa qoljetimdi elektrondyq servıs jáne ekinshi deńgeıli bankterdiń mobıldi qosymshalary arqyly qabyldanady.

Kólik quralynyń negizgi zańdastyrý krıterıılerine sáıkestigine sottylyqty, kedendik derekter bazasyn jáne basqa da aqparattyq júıelerdi aldyn ala tekserý prosesi tolyǵymen avtomattandyrylǵan. Zańdastyrý jumystary jalǵasyp jatyr.