Kúni keshe Úndistannyń Nıý-Delı shaharynda ótken bokstan áıelder arasyndaǵy álem chempıonaty óz máresine jetti. Dúbirli dodaǵa tolyq quramda qatysqan Qazaqstan quramasy jarys qorytyndysy boıynsha eki kúmis, tórt qola medal oljalap, jalpykomandalyq esepte 65 memlekettiń ishinde 8-orynǵa turaqtady. Al jalpy júlde sany jaǵynan Qytaıdan keıingi ekinshi orynǵa ıe boldy. Qytaı boksshylary Úndistanda úsh altyn, bir kúmis, úsh qola medal enshiledi.
Shámil Safıýllın jattyqtyratyn Qazaqstan quramasy sapynan eń úzdik nátıjege 57 kılo salmaqtaǵy Karına Ibragımova men asa aýyr salmaqtaǵy (+81 kg) Ləzzat Kúngeıbaeva qol jetkizdi. Ekeýi de bas júlde úshin aıqasyp, nátıjesinde, álem birinshiliginiń kúmis júldesin qanaǵat tutýǵa májbúr boldy.
Olımpıadalyq 57 kıloǵa deıingi salmaqta óner kórsetetin Karına Ibragımova Nıý-Delıdegi básekeniń fınalynda 2019 jylǵy Eýropa chempıony, byltyrǵy álem chempıonatynyń kúmis júldegeri, Tokıo Olımpıadasynyń qola medal ıegeri Italııa boksshysy Irma Testamen judyryqtasty. Asa tartysty ótken jekpe-jekte tóreshiler jeńisti biraýyzdan ıtalııalyq boksshyǵa berdi – 5:0. Osylaısha, byltyr Túrkııanyń Ystanbul qalasynda uıymdastyrylǵan álem birinshiliginde qola júldeger atanǵan K.Ibragımova bıyl kúmispen kúpteldi.
Fınaldyq jekpe-jekterdiń ekinshi kúninde 2016 jylǵy əlem chempıony Ləzzat Kúngeıbaeva jahandyq dodanyń eki dúrkin júldegeri marokkolyq Hadıdje Ál-Mardımen bas júlde úshin judyryqtasyp, 4:1 esebimen jol berdi. Al jartylaı fınalda jeńilgen Alýa Balqybekova (48 kg), Nadejda Rıabes (66 kg), Valentına Halzova (75 kg) jáne Farıza Sholtaı (81 kg) qola júldeger atandy.
Jalpykomandalyq esepte jarys qojaıyny – Úndistan 4 altynmen kósh bastasa, Qytaı quramasy jeti júldemen (3 altyn, 1 kúmis, 3 qola) ekinshi orynǵa ıe boldy. Úzdik úshtikti Reseı boksshylary túıindedi (1+1+1). Aıta keteıik, Halyqaralyq boks assosıasııasy (IBA) álem chempıony atanǵan boksshylarǵa – 100 myń, kúmis júldegerlerge – 50 myń, qola medal ıegerlerine 25 myń AQSh dollary kóleminde syıaqy tabystady.
