Álem chempıonatynde el namysyn qorǵaǵan elordalyq Ləzzat Kúngeıbaeva, Valentına Halzova, Rıma Volosenko men Aıda Ábikeevany áýejaıdan týystary, dostary men Astana qalasynyń Dene shynyqtyrý jáne sport basqarmasynyń basshysy Samat Jylqybaev jáne ózge mekeme qyzmetkerleri ystyq yqylaspen kútip aldy.
«Jalpy bul nátıjege kóńilim tolady. Quramamyz 6 medal jeńip aldy. Dese de áli tynbaı jumys isteýimiz kerek. Alda Azııa oıyndary kele jatyr. Ol synda bizdiń boksshylar barynsha kóbirek Olımpıada joldamasyna qol jetkizýi qajet», dep aıtty Qazaqstan boks federasııasynyń Atqarýshy dırektory Maratbek Myqtybekov.
Chempıonat qorytyndysy boıynsha Qazaqstan sportshylary barlyǵy 6 medal – 2 kúmis pen 4 qola ıelendi. Osylaısha, bas bapker Shámil Safıýllın shákirtteri sheteldegi jarystarda medal sany jaǵynan úzdik nátıje kórsetti. Sondaı-aq júlde sany jaǵynan jalpy esepte Qytaıdan keıin 2-orynǵa ıe boldy.
Qazaqstan quramasy sapynda Delıde sońǵy bolyp rıngke shyqqan asa aýyr salmaqtaǵy elordalyq (+81 kg) Ləzzat Kúngeıbaeva əlem chempıonatynyń 2 dúrkin júldegeri, marokkolyq Hadıdje El-Mardımen kúsh synasyp, tájirıbeli qarsylasyna ese jiberdi. Osy salmaqtaǵy basty favorıttiń birimen kezdeskenine qaramastan otandasymyz jarqyn jekpe-jek kórsetti. Aıta keteıik, Ləzzat 2016 jyly əlem chempıonatynda top jarǵan bolatyn.
Buǵan deıin kúmis medaldi Karına Ibragımova (57 keli) jeńip alǵan. Tórt sportshymyz – Alýa Balqybekova (48 kg), Nadejda Rıabes (66 kg), Valentına Halzova (75 kg) jáne Farıza Sholtaı (81 kg) álem chempıonatynyń qorytyndysy boıynsha qola júldeger atandy. Áıelder quramasy álem chempıonatynda osyǵan deıin munsha medal jeńip almaǵan edi.
Jalpy esepte jarys qojaıyny Úndistan 4 altynmen kósh bastasa, Qytaı 2-orynda (3 altyn, 1 kúmis, 3 qola). Úzdik úshtikti Reseı túıindedi (1/1/1). Al bizdiń qurama 8-satyda.
