Sportty damytý dıreksııasynyń baspasóz qyzmeti taratqan málimet boıynsha, erler arasyndaǵy jekeleı synnyń bas júldesin elordalyq Kırıll Gerasımenko men qaraǵandylyq Alan Qurmanǵalıev sarapqa saldy. Halyqaralyq jarystarda el namysyn abyroımen qorǵap júrgen qos sheberdiń arasyndaǵy tartysty báseke 4:1 esebimen Gerasımenkonyń paıdasyna sheshildi. Al áıelder arasynda Záýresh Aqasheva (Qaraǵandy oblysy) top jardy. Ol fınalda taǵy bir ulttyq qurama ókili Sarvınoz Mırkadırovaǵa (Shymkent) esh múmkindik bermedi (4:1). Bir qyzyǵy, byltyr Pavlodar qalasynda ótken el chempıonatynyń jekeleı syndaǵy fınalyna da osy 4 sportshy shyqqan bolatyn.
Aralas juptyq synda Záýresh Aqasheva men Vladıslav Zaharov dýeti Kırıll Gerasımenko men Anastasııa Lavrovaǵa tótep bere almady. Esep – 3:0. Úzdik úshtikti Bekulan Jamal pen Sarvınoz Mırkadırova (Shymkent) jáne Alan Qurmanǵalıev pen Araı Ashkeeva (Qaraǵandy oblysy) túıindedi.
Áıelder arasynda juptyq saıysta shymkenttik Sarvınoz Mırkadırova men Anel Baqyt juby Batys Qazaqstan oblysynan kelgen Gúlchehra Hýseınova men Alsý Saparovany jeńdi. Qola júlde Iýlııa Danııarova men Alına Dýbrovskaıa (Qostanaı oblysy) jáne Aııa Álimbaeva men Valentına Ýspanova (Almaty) jubyna buıyrdy.
Erler arasyndaǵy juptyq básekede Alan Qurmanǵalıev pen Vladıslav Zaharov fınalda aǵaıyndy Kırıll jáne Aleksandr Gerasımenkodan basym túsip, jarys jeńimpazy atandy. Qola medaldi Denıs Jolýdev/Saǵantaı Qurmambaev (ShQO) pen Baqdáýlet Ákimáli/Bekulan Jamal (Shymkent) juby ıelendi.
Komandalyq saıysta Qaraǵandy oblysynyń tennısshileri úzdik shyqty. Olar fınalda Shyǵys Qazaqstan oblysyn 3:1 esebimen tize búktirdi. Áıelder arasynda da Qaraǵandy oblysy quramasynyń ókilderi qarsylas shaq keltirgen joq. Jergilikti tennısshiler fınalda Shymkent komandasyn senimdi utty – 3:1.
Aıta keteıik, 20 naýryzda bastalǵan ústel tennısi básekesine 20 óńirden kelgen 180-nen astam sportshy qatysty.
