Uly oıshyl aqyn Shákárim Qudaıberdiulynyń týǵanyna 165 jyl tolýyna oraı uıymdastyrylǵan baıqaý 5-7 synyp oqýshylary arasynda ótti. Munda oqýshylar ǵulama aqynnyń óleńderin jattap, mánerlep aıta salmaıdy, ómiri men shyǵarmashylyǵyna qatysty suraqtarǵa jaýap berdi. Elimizdiń barlyq aýmaǵyn qamtyǵan rýhanı is-sharany Ulttyq akademııalyq kitaphana qolǵa alyp, «Adal-As» kompanııasy demeýshilik etti.
Áýeli 17 oblys pen 3 megapolıstegi ortalyq kitaphanalar aıasynda bastalǵan Shákárim oqýlaryna 5-7 synyp oqýshylary arasynan 2000 bala qatysypty. Bir aıǵa jýyq ýaqytta aımaqtardaǵy irikteýden súrinbeı ótken 22 oqýshy bilim jarysynyń jartylaı fınalyna ótip, respýblıkalyq baıqaýǵa joldama aldy. Al ozyq oqýshylardyń arasynan shyn júırikti anyqtaıtyn synaqty Ulttyq akademııalyq kitaphana onlaın rejimde ótkizdi. Buǵan qatysqan 22 talapker arasynan 11 úzdik oqýshy aqtyq synǵa ótip, Astanadaǵy qorytyndy baıqaýǵa jınaldy.
– Ulttyq akademııalyq kitaphana Shákárim muralaryn jalpy adamzatqa ortaq qazyna dep baǵalaı otyryp, ult tutastyǵyn nyǵaıtý mindetterin júzege asyrýǵa zor úles qosady dep esepteıdi. Al baıqaýdyń maqsaty – oqýshylardy dana babamyzdyń muralaryn tanyp, zertteýge yntalandyrý boldy. Respýblıkalyq baıqaýǵa elimizdiń 17 oblysy men 3 qalasyndaǵy barlyq mektepten 5-7 synyp oqýshylary qatysty. Baıqaýdyń respýblıka kóleminde aýqymdy ótýine oblystardaǵy kitaphanalar yqpal etti. Qatysýshylarǵa jatqa aıtýǵa 20 óleń berildi.Aqtyq synǵa oqýshylar Batys Qazaqstan, Mańǵystaý, Shyǵys Qazaqstan, Pavlodar, Atyraý, Qyzylorda, Jetisý, Jambyl, Qostanaı oblystary, Shymkent jáne Almaty qalalarynan keldi – deıdi Ulttyq akademııalyq kitaphananyń bas dırektory Ǵazıza Qudaıbergenqyzy.
Baıqaý jeńimpazdary men júldegerleri qazylar alqasynyń daýys berýi arqyly anyqtaldy. Qazylar alqasynyń quramynda «Adal-As» kompanııasynyń prezıdenti Ermek Mezibaev, tarıh ǵylymdarynyń doktory, professor Maqsat Alpysbes, fılologııa ǵylymdarynyń kandıdaty, «Abaı akademııasy» ǵylymı-zertteý ınstıtýtynyń dırektory Jandos Áýbákir, aqyn Yqylas Ojaı, Ulttyq akademııalyq kitaphana dırektory Ǵazıza Qudaıbergenqyzy, Halyqaralyq «Abaı» qorynyń basshysy Aslan Ǵafýrov bar.
Respýblıkalyq Shákárim oqýlarynyń jeńimpazdary men júldeger oqýshylaryn daıyndaǵan ustazdar arnaıy dıplomdar, Alǵyshattarmen jáne baǵaly syılyqtarmen marapattaldy. Qatarynan oza shapqan jas shákárimtanýshylarǵa baıqaýdyń bas demeýshisi – «Adal-As» kompanııasynyń negizin qalaýshy kásipker, mesenat Ermek Mezibaev baǵaly syılyqtar tabys etti.
– Kompanııamyz qoǵamdyq is-sharalar men mádenı-rýhanı jobalarǵa da barynsha qoldaý kórsetip, úles qosyp júrgenin aıtqym keledi. Osy bir ulaǵatty jumysty Astanadaǵy Ulttyq akademııalyq kitaphanamen birlesip qolǵa aldyq. Biz úshin izdenimpaz balalardyń júzindegi shattyqty kórip, sezinýdiń ózi jeńis, – deıdi respýblıkalyq «Shákárim oqýlary» baıqaýynyń bas demeýshisi, kásipker Ermek Mezibaev.
Sonymen qazylar sheshimimen Taraz qalasynan qatysqan 6-synyp oqýshysy Aıhanym Qaırat bas júldege ıe boldy. I oryndy Shákárim óleńderin mánerlep oqyp, suraqtarǵa tushymdy jaýap bergen Shymkent qalasynyń 5-synyp oqýshysy Dinmuhammed Kádirhan ıelendi. II oryndy Oral qalasynan 6-synyp oqýshysy Aıarý Ámirtaı, Qyzylorda oblysy Qazaly aýdanynan 7-synyp oqýshysy Gúlnaz Jeńisbek, Shyǵys Qazaqstan oblysy Altaı aýdanynan Arýjan Aıyrbaı teń bólisti. III oryndy Pavlodar oblysynan kelgen 7-synyp oqýshysy Gúlnaz Baqbergen, Qostanaı oblysy Jangeldi aýdanynan kelgen 7-synyp oqýshysy Aısha Qosylbek jáne Jetisý oblysy Jarkent aýdanynan qatysqan 5-synyp oqýshysy Júrsin Azıtaı ıelendi. Qalǵan qatysýshylarǵa da yntalandyrý syılyqtary men Alǵyshattar tabystaldy. Bas júlde men I, II, III orynǵa ıe bolǵan júldegerler baǵaly syılyq hám dıplomdarmen marapattaldy.
