Qasym-Jomart Toqaev jaqyn arada zańsyz shyǵarylǵan aktıvterdi memleketke qaıtarý boıynsha tıisti zań qabyldanatynyn atap ótti.
«О́tken jyldyń basynan beri ekonomıkany monopolııadan aryltý jumystary júrgizilip keledi. Bul – Úkimetten erik-jiger men joǵary kásibılikti talap etetin kúrdeli prosess. Bul jumysty jalǵastyrǵan jón. Transfertti baǵa belgileý, halyqaralyq salyq salý, sýbsıdııa men memlekettik resýrstardy bólý kezinde baqylaýdy qamtamasyz etetin túsinikti jáne tıimdi quraldardy qoldanysqa engizý qajet.
Prezıdent bolyp qaıta saılanǵannan keıin eń birinshi zańsyz shyǵarylǵan aktıvterdi memleketke qaıtarý jónindegi sharalar týraly Jarlyqqa qol qoıǵanymdy eske salamyn. Úkimet pen Bas prokýratýra jeke zań jobasyn ázirledi. Parlament tıisti zańdy jýyq arada qabyldaýy kerek», dedi Prezıdent.
Sondaı-aq osy máseleni jıi kóterip júrgen «Aq jol» partııasy belsendilik tanytanyna ári Parlamentke ótken Respublica partııasyna bıznestiń damýyna yqpal etetinine senim bildirdi.
«Jalpy orta jáne shaǵyn kásipkerlikti qoldaý saıasaty memleketimizdiń uzaq merzimge arnalǵan turaqty strategııasyna aınalýy kerek. «Aq jol» partııasy shaǵyn jáne orta bıznesti damytý, ekonomıkany monopolııadan aryltý týraly únemi aıtyp júr. Partııanyń Májilistegi depýtattary osy jumysqa óz úlesin qosady dep senemin. Sondaı-aq kásipkerlerdiń bastamasymen qurylǵan Respublica partııasy Parlamentke ótti. Bul uıym bıznestiń damýyna qolaıly jaǵdaı qalyptastyrýǵa atsalysady dep oılaımyn»», dep atap ótti Memleket basshysy.
