Polshany jeńe alamyz ba?

Qazaqstan ulttyq quramasynyń kapıtany Iаroslava Shvedova Polshamen ótetin kezdesýde myna tennısshilerge senim artady. Olar: Elena Rybakına (jekeleı synda WTA reıtınginde 7-oryn­da), Iýlııa Pýtınseva (WTA reıtınginde 43-orynda), Anna Danılına (jup­tyq synda reıtıngte 25-orynda), Gózal Aınıtdınova (jekeleı syn, WTA, 333-raketka), Janel Rústemova (jup­tyq syn, WTA, 973). Sonymen qatar qo­symsha oıynshy retinde Arýjan Sa­ǵyn­dyqova (jekeleı syn, WTA, 968) tir­kelgen.

Áıelder arasyndaǵy Qazaqstannyń birinshi, álemniń jetinshi raketkasy Elena Rybakına qazir naǵyz babynda. Jerlesimiz bul kúnderi AQSh-tyń Maıamı qalasynda ótip jat­qan WTA 1000 týrnırinde sátti óner kór­setip jatyr. Jýyrda ǵana muhıt­tyń arǵy betindegi Indıan-Ýells qala­synda uıymdastyrylǵan jyldyń alǵashqy «Masters» týrnırinde top jar­ǵan Rybakına Maıamıdegi dodada da sol jetistigin qaıtalaýǵa jaqyn. Otandasymyz keshe jarystyń shırek fınalynda álemniń 24-raketkasy ıtalııalyq Martına Trevızandy eki sette 6:3. 6:0 esebimen tize búktirip, jar­­­tylaı fınalǵa joldama aldy. Bul – qa­zaqstandyq tennısshiniń bıylǵy maý­symda qol jetkizgen qatarynan 12-shi jeńisi. Sondaı-aq otandasymyz qazirgi tańda eıs (birinshi doptan upaı alý) boıyn­sha álemde birinshi orynda keledi.

Al dúnıejúzilik reıtıngte 43-orynda turǵan Iýlııa Pýtınsevanyń ázirge joly bolar emes. Ol jyl basynan bergi jarystardyń ekinshi aınalymynan árige asa almaı keledi. Tek bir márte ǵana Aýstralııanyń Hobart qalasynda ótkizilgen jarystyń úshinshi kezeńinde oınaýǵa múmkindik alǵan edi. AQSh-ta uıymdastyrylǵan eń keıingi eki iri týrnırdiń birinshi aınalymynda-aq jarys jolynan shyǵyp qaldy. Sondaı-aq juptyq synda baq synaıtyn Anna Danılına keıingi jarystarda táýir óner kórsetip júr. Ulttyq quramaǵa alǵash ret shaqyrtý alǵan jas tennısshiler – Gózal Aınıtdınova, Janel Rústemova jáne Arýjan Saǵyndyqova bolashaǵynan úmit kúttiretin tennısshilerimizdiń qa­tarynda. Qazirgi ýaqytta olar da ere­sekter arasyndaǵy jarystarǵa qaty­syp, úlken tájirıbe jınap júr.

Polsha quramasyna keler bolsaq, komanda kapıtany Davıd Selt Qazaqstanmen ótetin mańyzdy oıynda álemniń 1-raketkasy, Rybakınanyń syralǵy qarsylasy Iga Shvıontekke senim arta almaıdy. Iga ótken aıda Dohada uıymdastyrylǵan dodada alǵan jaraqatyn Indıan-Ýellste asqyndyryp alyp, aldaǵy birqatar jarysqa qatysa almaıtynyn málimdedi.

Elordadaǵy matchta Polsha qura­masynyń namysyn Magda Lınett (jekeleı synda WTA reıtınginde 19-orynda), Magdalena Frenh (WTA reıtınginde 105-orynda), Alısııa Rosolska (WTA juptyq reıtınginde 39-orynda), Ve­ronıka Falkovska (WTA juptyq reıtınginde 92-orynda) qorǵaıdy.

Bul tennısshi­lerdiń ishinde Ma­g­da Lınettiń esimi Qazaqstan jankúıerlerine jaqsy tanys­ty. Bıylǵy Aýs­tra­lııa ashyq bi­rin­shili­giniń jartylaı fınalynda deıin jetken Magda búginge deıin Iýlııa Pý­tın­se­va­men je­ti márte kez­de­sip, so­nyń be­seýinde basym tús­ken. Eki kezdesýde otan­­da­symyzdyń baǵy janǵan. Son­daı-aq Lınett Elena Rybakınamen de bir márte sheberlik baıqasyp, jeńilistiń ker­mek dámin tatýǵa májbúr bolǵan. Eki tennısshi 2021 jyly Chehııanyń Ostrava qalasynda ótken týrnırdiń 1/8 fınalynda jolyǵyp, Elena úsh setke jalǵasqan matchta 6:3. 2:6, 6:1 esebimen basym túsken-di. Polsha quramasynyń ózge tennısshileri álemdik jarystarda áli jarqyrap kórine alǵan joq. Dese de olar túrli halyqaralyq dodalarda baq synap, úlken tájirıbe mektebinen ótip júr.

Polsha quramasy 1966 jyldan beri osy jarysta óner kórsetip keledi. Olar 1992 jáne 2015 jyldary burynǵy Federasııa kýbogi, qazirgi Bıllı Djın Kıng týrnırindegi eń úzdik nátıjesine qol jetkizdi. Polshalyqtar eki retinde de týrnırdiń shırek fınalyna deıin jetti. 1992 jyly Germanııa qyzdarynan 3:0 esebimen jeńilse, 2015 jyly Reseı qu­ra­masynan basym túse almaǵan edi – 4:0.

Joǵaryda aıtyp ótkenimizdeı, 2020 jylǵa deıin áıelder arasyndaǵy bul jarys – Federasııa kýbogi dep atalyp keldi. Úsh jyl buryn týrnır­diń ataýy ózgerip, oǵan AQSh-tyń áı­gili tennısshisi, «Úlken dýlyǵa» sa­na­tyndaǵy jarystardyń 39 dúrkin jeńimpazy Bıllı Djın Kıngtiń esimi berildi. 1960-1983 jyldar aralyǵynda óner kórsetken dańqty tennısshi bir­neshe jyl boıy álemniń birinshi raketkasy degen mártebeli ataqqa ıe boldy.

Astanada ótetin Qazaqstan – Polsha matchy ádettegideı tórt jekeleı kezdesýden jáne bir juptyq básekeden turady. Ár oıyn úsh setke jalǵasady. Jarystyń birinshi kúninde tennısshiler jekeleı synda eki oıyn, kelesi kúni taǵy da eki match ótkizedi. Quramalar tórt match qory­tyndysy boıynsha teń túsip jatsa, jeńimpaz juptyq synda anyqtalady. Sóıtip bes matchtyń qorytyndysy bo­ıyn­sha jeńiske jetken qurama kúzde óte­tin týrnırdiń fınaldyq kezeńine joldama alady.

Sondaı-aq Qazaqstan – Polsha qura­masynan bólek, álem chempıonatynyń fınalyna shyǵý úshin Ispanııa – Meksıka, Ýkraına – Chehııa, Ulybrıtanııa – Fransııa, Kanada – Belgııa, AQSh – Aýstrııa, Slovakııa – Italııa, Germanııa – Brazılııa jáne Slovenııa – Rýmynııa tennısshileri irikteý matchtarynda kúsh synasady.

Sóıtip toǵyz juptyń jeńimpazy byltyrǵy Bıllı Djın Kıng ký­bo­ginde top jarǵan Shveısarııa, fınalıst Aýstralııa jáne jarysty qabyl­daýshy el quramalarynyń qata­ryn tolyqtyryp, 2023 jylǵy chempıon­dyqty sarapqa salady. Al irikteý ke­zeńinen óte almaǵan komandalar qa­rasha aıynda álemdik toptaǵy ornyn saqtap qalý úshin pleı-off satysynda baq synaıdy.