Ortalyq Azııa tehnologııalyq forýmy aıasynda ótken baıqaýǵa barlyǵy 114 ótinim túsken, onyń 39-y Qazaqstannan berilgen. Baıqaýda jeńiske jetken otandyq startaptar – Astana Hub músheleri. Máselen, Networks Energy startapy temirjol kóligin óńdeý jáne temirjol salasyndaǵy bıznes-úderisterdi avtomattandyrýǵa arnalǵan IT-platforma jasaý arqyly kúlli aımaqtyń tehnologııalyq sektoryna aıtarlyqtaı áser etkeni úshin «Ortalyq Azııadaǵy jyl serpini» ataǵyna ıe boldy. Atalǵan kompanııanyń arqasynda elimiz temirjol tasymaly úderisterin avtomattandyrýǵa jol ashatyn biregeı ónimge qol jetkizip, IBM nemese SAP tehnologııalyq alpaýyttarynyń lısenzııasy men sheshimderinsiz jumys isteýge múmkindik aldy.
– Ortalyq Azııa aımaǵyndaǵy IT-tehnoparkterdiń kóńilinen shyǵý – biz úshin úlken mártebe. Bul marapat kompanııanyń Qazaqstandy aımaqtaǵy kóliktik jáne sıfrlyq habqa aınaldyrýdaǵy úzdiksiz kúsh-jigeriniń mańyzdylyǵyn kórsetedi. Bizdiń komanda óńirdegi logıstıkalyq salada ozyq tehnologııalardy ázirleý jáne engizý boıynsha óz mıssııasyn jalǵastyrady, – dedi Networks Energy bas dırektory Baqyt Erjanov.
Otandyq ónertapqysh ári pedagog Rústem Ermekov «Ortalyq Azııadaǵy jyldyń IT-pedagogi» atalymynda úzdik dep tanyldy. Ol 2021 jyly «30-ǵa deıingi Forbes»-tiń tizimine endi, sonymen qatar QBit – robottehnıkaǵa arnalǵan qazaqstandyq jınaqty jasaǵany úshin Saby qorynyń grantyn jeńip aldy.
– Bilim salasynda júrgenime 6 jyldaı boldy. Jumysym taza entýzıazmǵa negizdelgen. Sebebi durys bilim berý jáne synı turǵydan oılaýdy damytý arqyly álemdegi qordalanǵan máselelerdi sheshýge bolatynyna senimdimin. Qazirgi ýaqytta ártúrli bilim berý sheshimderin ázirlep jatyrmyz. Negizgi ónimderimizdiń biri – QBit, balalarǵa STEM ınjenerııasyn, robottehnıkany jáne baǵdarlamalaýdy úıretýge arnalǵan jınaq. Jaqynda micro:lab shaǵyn sıfrlyq zerthanamyzdy da iske qosamyz, – dep josparymen bólisti Rústem Ermekov.
Qazaqstan atynan qatysqan taǵy bir joba – Red_mad_robot central asia «Eń jyldam damyp kele jatqan IT-kompanııa – Eksport – shetelde aqparattyq-kommýnıkasııalyq tehnologııa qyzmetteriniń aýtsorsıngi» atalymynda jeńiske jetti. Kompanııa shaǵyn jáne orta kásipkerlikke bıznes baǵyttary bar ámbebap bankter úshin qarjylyq jáne qarjylyq emes qyzmetterge arnalǵan sıfrlyq platformalar ázirleıdi.
«Central Asian Tech Awards – 2023» baıqaýyna Qyrǵyzstannyń Joǵary tehnologııalyq parki, Astana Hub, IT Park Uzbekistan jetekshileri jáne Ortalyq Azııanyń IT-ındýstrııasynyń basqa da sarapshylary qazylyq etti. Ortalyq Azııa tehnologııalyq forýmy Ortalyq Azııa, Japonııa, Germanııa, Ońtústik Koreıa jáne AQSh-tan kelgen 50-den asa IT-kompanııa men 600 qatysýshynyń basyn qosty.
