Kásipqoı boks • 31 Naýryz, 2023

Qarsylasy belgili boldy

WBO nusqasy boıynsha orta salmaqtaǵy álem chempıony Jánibek Álimhanuly (13-0, 8 KO) óziniń kelesi kezdesýin 13 mamyrda (Astana ýaqytymen 14 mamyr) AQSh-tyń Kalıfornııa shtatyndaǵy Stokton qalasynda ótkizedi. Bul jolǵy qarsylasy – kanadalyq Stıven Batler (32-3-1, 26 KO).

Álı BITО́RE

Erteń, ıaǵnı 1 sáýir kúni ordaly 30 jasqa tolatyn Jánibek Álimhanuly 2022 jyldyń 21 mamyrynda ulybrıtanııalyq Dennı Dıgnýmdy ekinshi raýndta uryp jyǵyp, orta salmaqtaǵy WBO nusqasynyń «ýaqytsha chempıon» ataǵyn ıelengen bolatyn. Sol jyldyń tamyz aıynda WBO chempıony atanyp turǵan amerıkalyq Demetrıýs Andrade otandasymyzǵa qarsy óz ataǵyn qorǵaýdan bas tartyp, jerlesimiz jekpe-jeksiz-aq álem chempıony atanǵan-dy.

Al ótken jyldyń sońynda Jánibek ózine tıesili altyn belbeýin alǵash ret sátti qorǵady. 12 qarasha kúni AQSh-tyń Nevada shtatynda uıymdastyrylǵan jekpe-jek keshinde Álimhanuly ózinen eki jas kishi anglııalyq Denzel Bentlımen judyryqtasty. Sol kezde orta salmaqtaǵy álemdik reıtıngte 14-orynda turǵan brıtanııalyq boksshy otandasymyzǵa laıyqty deńgeıde qarsylyq kórsetkenin aıta ketken jón. 2017 jyldan beri kásipqoı boksta judyryqtasyp kele jatqan Denzel osy ýaqyt aralyǵynda sharshy alańǵa 19 márte kóterilip, 17 jekpe-jeginde jeńiske jetken. Sonymen qatar 14 qarsylasyn esinen tandyrǵan tájirıbeli boksshy bolatyn. Dese de, Jánibek qarsylasy qansha qarymdy bolsa da, 12 raýndtyń qorytyndysy boıynsha Bentlıden basym tústi. Sóıtip, jerlesimiz birinshi ret chempıondyq belbeýin sátti qorǵady.

Endi, mine, orta salmaqta absolıýtti álem chempıony atanýdy aldyna maqsat etip qoıǵan daryndy boksshymyz byltyr jeńip alǵan altyn beldigin ekinshi márte qorǵamaq. Jekpe-jek 12 myń jankúıerge arnalǵan Stokton qalasyndaǵy «Stokton-Arena» sport kesheninde ótedi dep josparlanǵan.

Osy oraıda oqyrmandarǵa Jánibektiń kelesi qarsylasy týraly az-kem málimet bere keteıik. 27 jastaǵy Stıven Batler Kanadanyń Kvebek qalasynda týyp-ósken. Kásipqoı boksta judyryqtasyp júrgenine bıyl toǵyz jyl. Sol aralyqta ol 36 márte sharshy alańǵa kóterilip, 32 ret jeńiske jetken. Sondaı-aq 26 qarsylasyn merziminen buryn tize búktirgen. 2015 jyldyń kúzinde amerıkalyq Haıme Erreramen judyryqtasyp, tóreshilerdiń sheshimimen teń tústi. Keıinnen ol 2017 jyly otandasymyz Qanat Islamnyń eks-qarsylasy, óziniń jerlesi Brendon Kýkten – jetinshi, araǵa eki jyl salyp 2019 jyldyń jeltoqsanynda Japonııada dańqty boksshymyz Gennadıı Golovkınnen jeńilgen jergilikti Rıota Mýratadan besinshi raýndta tehnıkalyq nokaýtpen jeńildi.

Sonymen qatar Stıven Batler 2017 jyly Golovkın-Alvares arasyndaǵy birinshi jekpe-jek aldynda meksıkalyq boksshynyń sparrıng-seriktesi retinde jumys istep, «Kaneloǵa» kómektesken bolatyn. Batler – kanadalyq «Eye of Tiger Managament» promoýterlik kompanııasynyń boksshysy. Biraz jyl buryn atalǵan promoýterlik uıymmen birqatar Qazaqstan boksshysy da jumys istegen. Atap aıtqanda, birinshi jartylaı orta salmaqtaǵy Batyr Júkembaev, jeńil salmaqtaǵy Abylaıhan Qusaıynov, ekinshi orta salmaqtaǵy Nurzat Sabırov, birinshi orta salmaqtaǵy Sadrıddın Ahmedov sekildi tanymal boksshylarymyz atalǵan uıym aıasyndaǵy jekpe-jek keshterinde óner kórsetken.

2021 jyldyń qańtarynda Batler meksıkalyq Hose de Hesýs Masıasqa da besinshi raýndta ese jiberip, jankúıerlerin jerge qaratty. Degenmen kanadalyq boksshy keıingi tórt jekpe-jegin jeńispen aıaqtady. Ol óziniń eń keıingi kezdesýin 2022 jyldyń jeltoqsan aıynda Kanadada ótkizip, amerıkalyq Djoshýa Konlıdi 10 raýndqa josparlanǵan aıqasta tóreshilerdiń sheshimimen jeńdi. Kanadalyq boksshy qazirgi tańda WBO reıtınginde altynshy orynda tur.

Jánibek Álimhanuly men Stıven Batler 13 mamyrda judyryqtasatyny resmı jarııalanǵan soń, eki boksshy jekpe-jek týraly alǵashqy pikirlerin ortaǵa saldy.

«Orta salmaqtaǵy boksshylardyń bári menen qorqyp, jekpe-jekke shyǵýdan bas tartyp otyr, sondyqtan Stıven Batlerge menimen judyryqtasýǵa keliskeni úshin alǵysymdy bildiremin. Meniń jaqyn aradaǵy basty maqsatym – orta salmaqtaǵy barlyq tıtýldy biriktirý ekenin barshańyz jaqsy bilesizder. Biraq sol jolda Batlerden aınalyp óte almaımyn. Ol myqty qarsylas, sol sebepti Stoktondaǵy jankúıerler men boks keshin ESPN telearnasy arqyly tamashalaıtyn kórermenderge naǵyz tartysty boks shoýyn syılaımyz degen úmittemin», deıdi J.Álimhanuly.

Al Stıven Batler qysqa ǵana qaıyryp, óz jankúıerlerinen 13 mamyrda úlken sensasııaǵa daıyn bolýyn surap, álem chempıony belbeýin Kvebek qalasyna ákeletinin málimdedi.