Aqtaýda ýaqyt talabyna saı logıstıkalyq ortalyq salynady

ASTANA. 2 shilde. Aqtaýda Qazaqstan men Ázerbaıjan Prezıdentteriniń kelisimi sheńberinde iri logıstıkalyq ortalyq salynbaq. Bul týraly «24kz» habarlady. Mańǵystaý oblysynyń ákimi Alık Aıdarbaev: «Búgingi tańda «Aqtaý teńiz porty» arnaıy ekonomıkalyq aımaǵynda 23 iri kompanııa qyzmet etýde. Solardyń ishinde úlken dıametrli qubyrlar shyǵaratyn «Arselor mıttal Aqtaý» zaýyty, temir konstrýksııalaryn shyǵaratyn «Keppel Qazaqstan» jáne ıspandyq «Indeks» kompanııalary iri jobalardy iske asyrýdy bastap jatyr. Sol kompanııalardyń qataryna, mine, búgin taǵy da bir iri joba qosylǵaly tur», – dedi. Quny 14 mln. eýro turatyn atalǵan ınvestısııalyq joba «Azersýn holdıng» kompanııasyna tıesili. «Azersýn logıstıka jáne óndiris ortalyǵy» elimizge keletin taýarlar men elden eksporttalatyn ónimderdi qabyldap, saqtap, ony temirjol men teńiz arqyly jóneltý jumystaryn atqaratyn bolady. Munda álemdik logıstıka óndirisiniń eń sońǵy úlgidegi tehnologııalary qoldanylmaq. Mamandardyń aıtýynsha, irge tasy qalanyp otyrǵan logıstıkalyq ortalyq eldegi shaǵyn jáne orta bıznestiń damýyna, kásipkerliktiń órkendeýine mol úles qosady. Sondaı-aq, ol Mańǵystaý óńirindegi azyq-túlik qaýipsizdigin qamtamasyz etýge múmkindik beredi. Buǵan qosa, shóleıtti aımaq turǵyndary naryqtaǵydan arzan ári sapaly kókónis pen jemis-jıdekke qoly jetkizetin bolady. Al óz kezeginde Ázerbaıjan Ekonomıka jáne ónerkásip mınıstri Shahın Mustafaev: «Bul – eki eldiń basshylarynyń tikeleı tapsyrmasy arqyly ózara kelisim negizinde týyndaǵan joba. Qysqa merzim ishinde qazaqstandyq tarappen ózara áriptestik memorandýmyna qol qoıyldy. Bul nysan memleketterimizdiń ekonomıkasyndaǵy munaı-gaz salasynan tys sektorlardyń damýyna zor yqpalyn tıgizedi degen oıdamyz», – dedi. Joldybaı Bazar. Derekkóz: «24kz». Foto: news.delovoimir.kz.