Sýretterdi túsirgen Erlan OMAR, «EQ»
Jalpy, Qazaqstannyń kez kelgen aımaǵy óziniń ásem tabıǵatymen, kórikti jerlerimen týrısterdi tartýǵa qaýqarly. Ár aımaqtyń nemese eldiń ózine tán tabıǵı ereksheligi bolatyny sııaqty jer kólemi jaǵynan álemde toǵyzynshy oryn alatyn bizdiń elimizdiń de ár aımaǵy týrızmniń kez kelgen salasyn damytýǵa múmkindik beredi. Ásirese ońtústik óńirde týrızmniń barlyq baǵytyn belsendi damytýǵa bolady. Atap aıtqanda, keıingi kezderi týrıster arasynda eń kóp suranysqa ıe bolyp júrgen emdik-saýyqtyrý, kýrortty, ekologııalyq, iskerlik, mádenı, tarıhı, sporttyq, agro jáne taǵy basqa da týrızmniń salalaryn jandandyrýǵa múmkindik bar. Bul tizimge gastronomııalyq týrızmdi de qosýǵa bolady.
Iá, búginde sheteldik týrısterdi tek tabıǵaty ásem jerlermen ǵana emes, ata-babamyzdan mıras bolyp qalǵan dástúrli ulttyq taǵamdarymyz arqyly da tarta alamyz. Jýyrda gastronomııalyq týrızm boıynsha Túrkistan qalasynda elimizde alǵash ret «Gastro Fest Turkistan – 2023» festıvali uıymdastyryldy.
Túrlengen Túrkistan qalasynyń kórnekti belgisine aınalatyn, óńirdegi qoǵamdyq tamaqtaný salasyn damytýǵa jáne gastronomııalyq brendin qalyptastyrýǵa úles qosý maqsatynda jáne Naýryz merekesine oraılastyryp uıymdastyrylǵan gastrofestıval oblystyq Týrızm basqarmasynyń «Open Turkistan» týrıstik aqparattyq ortalyǵynyń qoldaýymen keń kólemde atalyp ótti.
Qalanyń 30-ǵa jýyq meıramhanasy men dámhanasy gastrofest qonaqtaryna ulttyq taǵamdar, jergilikti delıkatester jáne strıt-fýd dámderin, táttiler men sýsyndaryn usyndy. «Uly dala eli» ortalyǵynyń aımaǵynda ótken mańyzdy is-sharaǵa alys-jaqyn shetelderden jáne ózge de aımaqtardan 10 myńnan asa qonaq qatysty. Sonymen qatar is-sharaǵa jergilikti jáne Reseı, О́zbekstan, Qytaı, Nıderlandtan 100-ge jýyq kompanııa ókilderi kelip, iskerlik baılanystar ornatýǵa múmkindik aldy.
«Kórme-jármeńke aýyl sharýashylyǵy men tamaq ónerkásibi ónimderi men qyzmetterimen tanystyrý jáne satý maqsatynda ótkizildi. Kórme-jármeńke aıasynda aýyl sharýashylyǵy men tamaq ónerkásibin damytý salasyndaǵy jahandyq taqyryptarǵa arnalǵan forým uıymdastyryldy. Sonymen qatar is-shara barysynda túıeler sherýi, kókpar oıyny, etnoqalashyq, gastrofestıval, konserttik baǵdarlamalar men túrli shoýlar ótti. Buǵan qosa sporttyq baǵdarlamalar men ulttyq oıyndar, qasıetti oryndar men kesenelerdi aralaý jáne shyǵys taǵamdarynan dám tatý, qolóner sheberhanalarymen tanysý sııaqty is-sharalar da baǵdarlamamyzda boldy. Bul is-sharalar jalpy týrızm men agrotýrızmniń damýyna oń yqpal etedi dep úmittenemiz. Sondaı-aq Naýryz merekesine oraı «Kerýen saraı» kesheninde 30 kıiz úı tigilip, tól jańa jylymyzdyń mán-mańyzyn taǵy bir márte asha túskendeı boldyq», dedi sharany uıymdastyrýshy, «ExpoGroup» kompanııasynyń dırektory Sholpan Qojabaeva.
Túrkistan oblysy Aýyl sharýashylyǵy basqarmasy basshysynyń orynbasary Nurjigit Myrzahmetovtiń aıtýynsha, bul ıgi is-shara endi jyl saıyn turaqty túrde Túrkistan qalasynda ótkizilip turmaq.
«Oblysymyz elimizdegi agrarly aımaqtyń qataryna jatady. Úsh kúnge jalǵasqan kórme-jármeńkede aýyl sharýashylyǵy men tamaq ónerkásibi boıynsha 15-ke jýyq memorandým jasaldy. Sondaı-aq aýqymdy is-sharada úzdik kıiz úıler men jetistikter stendterine óńiraralyq konkýrstar uıymdastyrdy. Atalǵan kórme-jármeńkede otandyq taýar óndirýshiler men saýda obektileriniń tikeleı ózara is-qımylyna baǵyttalǵan «Qazaqstanda jasalǵan» jalpyulttyq jobasy usynyldy. Sonymen qatar oblysymyzda tuńǵysh ret uıymdastyrylǵan aýqymdy kórme demeýshilerdiń qoldaýymen ótkenin aıta ketken jón. Aldaǵy ýaqytta bul ıgi dástúr óz jalǵasyn taýyp, jyl saıyn uıymdastyramyz degen nıettemiz», deıdi Túrkistan oblysy Aýyl sharýashylyǵy basqarmasy basshysynyń orynbasary Nurjigit Myrzahmetov.
