«Maqsattarǵa qol jetkizý» blogy boıynsha qorytyndylardy engizý kezinde QR Joǵary aýdıtorlyq palatasy tıisti úles mánderin bere otyryp, bloktar boıynsha nátıjelerdi qosý arqyly baǵalanatyn ortalyq memlekettik jáne jergilikti atqarýshy organdar bólinisinde biryńǵaı reıtıng qalyptastyrady:
1) maqsattarǵa qol jetkizý – 45%;
2) memlekettik organnyń jeke jáne zańdy tulǵalarmen ózara is-qımyly – 30%;
3) memlekettik organnyń uıymdastyrýshylyq damýy – 25%.
«Bul rette ortalyq memlekettik organdardyń biryńǵaı reıtıngi operasııalyq baǵalaýdyń barlyq blogy boıynsha baǵalanatyn ortalyq memlekettik organdar qatarynan qalyptastyrylady», delingen «Ashyq» NQA portalynda jarııalanǵan Jarlyq jobasynda.
Qazirgi zańnamada mundaı norma joq. Buǵan qosa, baǵalaýdy júrgizý ádistemesin, progress ındeksin esepteý jónindegi jobalardy memlekettik organdarmen kelisý mindeti QR Joǵary aýdıtorlyq palatasyna júkteledi.
Sonymen qatar jańa ózgeris boıynsha jyldyq baǵalaý qorytyndylary týraly esep endi Prezıdentke jeltoqsanda emes, shilde aıynda beriledi.
«Baǵalaý qorytyndylary boıynsha baǵalanatyn memlekettik organ baǵalaý blogy nemese biryńǵaı reıtıng boıynsha reıtıngte sońǵy 3 pozısııanyń birinde bolsa, sondaı-aq senip tapsyrylǵan saladaǵy (qyzmet salasyndaǵy) ahýaldyń 3 jyl qatarynan nasharlaǵany anyqtalǵan jaǵdaıda, QR Prezıdentiniń Ákimshiligi QR zańnamasynda aıqyndalǵan quzyretine baılanysty tıisti memlekettik saıası qyzmetshiniń nemese ortalyq memlekettik organnyń apparat basshysynyń, oblys, respýblıkalyq mańyzy bar qalalar, astana ákiminiń apparaty basshysynyń jaýapkershiligi máselesin qaraý týraly usynys engizedi», delingen Jarlyq jobasynda.
Aıta keteıik, qoldanystaǵy ereje boıynsha qandaı da bir máseleni 2 jyl sheshe almaǵan basshylarǵa qatysty shara qoldanylady. Endi onyń merzimi 3 jyl bolyp bekitilmek.
Prezıdent Jarlyǵynyń jobasy 18 sáýirge deıin kópshilik talqylaýda bolady.
