Memleket tarapynan sút óndirisin eseleý úshin aıtarlyqtaı qoldaý kórsetilip jatyr. Nátıjesinde, kórsetkish ótken jylmen salystyrǵanda 1,6 paıyzǵa artty. Álbette, munymen toqtap qalýǵa bolmaıdy. Aldaǵy ýaqytta tyndyratyn tirlik az emes. О́ıtkeni óńir basshysy Nurjan Nurjigitov sút óndirisiniń aıasyn keńeıtýge aıryqsha mán berip otyr.
Sút ónimderin óndirýde Baýyrjan Momyshuly aýylynda ornalasqan «Ali-Ko Sut» shaǵyn sút sehynyń da aıtarlyqtaı úlesi bar. Muratbek Nysanov basqaratyn seh jumysy jyl ótken saıyn ónim kólemin arttyryp otyr. Jańa istiń kózin tabýǵa umtylǵan kásipker 2021 jyly shaǵyn seh ashqan.
«Sút óńdeıtin sehqa qajetti apparattardy Reseı Federasııasynan 25 mıllıon teńgege satyp alǵanbyz. Muzdatqysh, sút, qaımaq pasterleýge arnalǵan apparattar, seperator, m a ı daıyndaıtyn apparat jáne ózge qurylǵylarymyz jetkilikti. Sehty ashý úshin shamamen 40 mıllıondaı qarjy jumsadyq. Árıne, kiris kirýi úshin aldymen shyǵyndanýǵa týra keledi. Bastysy seh jumysy búginde aıtarlyqtaı nátıje bere bastaǵany kóńil qýantady», deıdi M.Nysanov shaǵyn sút sehyn ashý ońaıǵa soqpaǵanyn aıtyp.
Kásipkerdiń aıtýynsha, seh jumysyn júıeleý úshin jergilikti mamandardy jumysqa tartqan. Olar óz kezeginde aýysymmen eńbek etedi. Al munda óndirilgen ónim negizinen ishki naryqty qamtıdy.
«Biz mamandardy tańdaýda jergilikti turǵyndarǵa basymdyq berdik. Búgingi kúni aýyldyń jeti birdeı azamaty turaqty jumyspen qamtylǵanyn aıta ketken lázim. Olar tıisinshe aýysymmen jumys isteıdi. Orta eseppen jalaqylary 100 myń teńgeden joǵary. Bir qýanyshtysy – jumysqa qabyldanǵan azamattardyń barlyǵy óz isin jetik biletin mamandar. Sondyqtan jumys barysynda aıtarlyqtaı másele joq.
Sehta tehnolog, zerthanashy, maı daıyndaýshy, sút qabyldaýshy sekildi mamandarmen birge ártúrli jumystardy júzege asyratyn qyzmetkerlerimiz bar. Olar jumysqa arnalǵan arnaıy kıimmen tolyqtaı qamtylǵan. Bastysy, sanıtarlyq talaptar, tehnıkalyq qaýipsizdik sekildi erejeler qatań saqtalǵan. Qyzmetkerlerdiń óz isine asqan jaýapkershilikpen qaraıtyny qýantady», deıdi kásipker.
M.Nysanovtyń aıtýynsha, seh qyzmetkerleri aýdanǵa qarasty aýyldardan táýligine 1,5 tonna sút qabyldaıdy eken. Sehta óndirilgen ónimder aýdan ortalyǵyndaǵy dúkenderge ótkiziledi. Sonymen qatar Taraz jáne Almaty qalalaryna jóneltiledi. Búginde irimshik, maı, qaımaq óndirip otyrǵan kásipker aldaǵy ýaqytta aıran men syr óndirý jumystaryn qolǵa alýǵa bekinip otyr.
Salada shırek ǵasyrlyq eńbek ótili bar tehnolog Tatıana Jýkovskaıa ónim óndirýdiń ózine tán mashaqaty mol ekenin aıtady. Rasynda da tehnolog mamannan bastap, bilek sybanyp ter tógip jatqan ózge mamandardy kórgende jumys úderisiniń ońaı emestigin birden túsinesiń. Sút qabyldaý kezeńinen bastap, sút óńdeý úderisiniń basy-qasynda júretin mamandardyń eńbegi adal.
Iá, sehtyń bir bóliginde qurt, endi bir bóliminde súzbe, irimshik jasap jatqan qyzmetkerlerdiń mańaıyna moıyn burýǵa murshasy joq ekendigi kórinip-aq tur. «Adal eńbek bárin jeńbek» degenniń mánin osyndaıda túsinesiń. Jumysy jolǵa qoıylǵan shaǵyn sehta basqa da ónimderdi óndiretin kún alys emes. Oǵan kúmán da joq.
Jambyl oblysy,
Jýaly aýdany,
Baýyrjan Momyshuly aýyly
