– Iаroslava, aldaǵy matchtyń mańyzdylyǵy sondaı, Qazaqstan quramasy jeńiske jetken jaǵdaıda óz tarıhynda ekinshi ret komandalyq álem chempıonatynyń fınaldyq kezeńine joldama alady. Árıne, match óz alańymyzda ótetindikten, Qazaqstan quramasynyń jeńiske jetý múmkindigi kóbirek ekeni kúmánsiz. Degenmen qarsylasqa joǵarydan qaraýǵa da bolmaıtyn shyǵar.
– Iá, árıne, qaı qarsylas ta óz aldyna úlken maqsat qoıady. Sondyqtan jaýapty sátte qapy qalmaý kim-kim úshin de óte mańyzdy. Sol sebepti biz Astanada oıyn bastalmastan bir apta buryn jınalýdy kózdep otyrmyz. Ortalyq kortta topyraq tóseldi, sport kesheni matchqa tolyq daıyn. Bizde kortqa erterek beıimdelip, jaqsylap daıyndalýǵa múmkindik bolady.
– Aldaǵy básekege oıynshylar qandaı jaǵdaıda kelgeli otyr?
– О́zderińiz biletindeı, qazirgi tańda tennısshilerimizdiń barlyǵy óz babynda. Maýsymdy tabysty bastap, Aýstralııa ashyq chempıonatynyń fınalyna deıin jetip, Indıan-Ýellstegi «Masters» dodasynda jeńis tuǵyrynan kóringen komanda kóshbasshysy Elena Rybakınanyń aıaq-alysy tek jankúıerlerdi ǵana emes, bizdi de qýantady. Ol Maıamıde de tabysty óner kórsetip, fınalǵa deıin jetti. Anna Danılına men Iýlııa Pýtınseva topyraq tósenishinde ádettegideı táýir oınaýy kerek, ásirese Iýlııa jap-jaqsy óner kórsete alady. Sondaı-aq komandamyz jańaryp jatyr. Quramaǵa Gózal Aınıtdınova men jastar sapynan Janel Rústemovany shaqyrdyq. Qyzdarǵa qosalqy oıynshy retinde Arýjan Saǵyndyqova da kómek kórsetedi. Janel men Arýjan – bizdiń bolashaǵymyz. Biz olardyń negizgi oıynshylardyń qataryna erterek qosylýyn qalaımyz.
– Polsha tennısshilerin qanshalyqty zerttep úlgerdińiz?
– Polsha – tájirıbe men jas tennısshiler shoǵyrlanǵan myqty ujym. Olardyń álsiz jáne myqty tustaryn áli de zerttep, zerdelep jatyrmyz. Byltyrǵy irikteý kezeńiniń jerebesi biz úshin sátti bolyp, elordada ótken matchta Germanııa quramasyn jeńip, álem chempıonatynyń fınaldyq kezeńine joldama alǵan bolatynbyz. Bıyl da irikteý básekesin Astanada ótkizemiz. Bul joly da tek jeńis úshin oınap, jankúıerlerimizdi qýantý úshin bar kúshimizdi salamyz jáne de jankúıerlerimizdiń erekshe qoldaýyn kútemiz.
– Jaraqatyna baılanysty Astanaǵa álemniń birinshi raketkasy Iga Shventek kelmeıtin boldy. Bul Qazaqstan quramasy úshin qanshalyqty tıimdi bolmaq?
– Qazirgi tańda Iga – tek Polsha quramasynyń ǵana emes, álemniń úzdik oıynshylarynyń biri. Árıne, Shventek kelgende match bizdiń tennısshilerge ońaıǵa soqpaıtyny belgili edi. Biraq Bıllı Djın Kıng kýbogi komandalyq álem chempıonaty bolǵan soń, bul jerde tennısshilerdiń reıtıngtegi orny, jeke sheberligi mańyzdy ról atqara bermeıdi. Polsha komandasy Shventeksiz de myqty, álemniń 20-raketkasy Magda Lınett, juptyq synda jaqsy oınaıtyn tennısshileri bar. Polsha quramasy Shventeksiz de qaýipti, muny jaqsy túsinemiz.
– Siz Qazaqstannyń áıelder quramasymen birge birazdan beri jumys istep kelesiz. Kapıtan retinde kóńilińiz tolmaıtyn tustar bar ma?
– Qazir meniń bar oıym, maqsatym – aldaǵy matchta jeńiske jetip, qyzdarmen birge Bıllı Djın Kıng kýboginiń fınaldyq kezeńine shyǵý. Eń bastysy, biz qaıda júrsek te, qaıda óner kórsetsek te, eldiń, jankúıerlerdiń qoldaýyn sezinip kelemiz. Bul – úlken baqyt. Endeshe, el úmitin aqtaýdan basqa maqsat joq bizde.
– Ýaqyt taýyp, oı bóliskenińizge kóp rahmet.
Áńgimelesken
Álı BITО́RE,
«Egemen Qazaqstan»
