Jarysqa barlyǵy 680 sportshy qatysty. Qazaqstan quramasy týrnırdi jalpy medaldyq esepte birinshi orynmen aıaqtady. Bizdiń jas dzıýdoshylar 7 altyn, 6 kúmis jáne 14 qola medal jeńip aldy. Alǵashqy úshtikke О́zbekstan men Qyrǵyzstan komandalary da kirdi.
Jarystyń jeńimpazdary men júldegerleri reıtıngtik upaılarǵa ıe boldy. Halyqaralyq dzıýdo federasııasynyń (IJF) erejeleri boıynsha chempıondar 100 upaı, kúmis júldegerler 60 upaı, qola júldegerler 40 upaı alý kerek. Bul upaılar sportshylarǵa Álem chempıonatyna irikteý jarystaryna qatysýǵa múmkindik beredi.
Týrnır aıasynda sýdıalarǵa arnalǵan halyqaralyq semınar-emtıhan da ótti. Onyń qorytyndysy boıynsha eki qazaqstandyq mamanǵa IJF kontınentaldy sýdıasy ataǵy berildi, bir tóreshi halyqaralyq sýdıa mártebesin aldy.
«Dzıýdoshylarymyz Azııa kýbogynda úzdik nátıje kórsetti. Jeńimpazdarǵa reıtıngtik upaı beriletin bolǵandyqtan osal qarsylas bolǵan joq. Jas sportshylardyń jetistikteri otandyq dzıýdo kúresi durys baǵytta damyp jatqanyn jáne bolashaǵy zor ekenin kórsetedi. Elimizde atalǵan sport túrine erekshe kóńil bólinedi. Máselen, jańa ári qoljetimdi sport nysandaryn salyp jatyrmyz. Sondaı-aq dzıýdo óte joǵary deńgeıde damyǵan Fransııa sııaqty elderden jattyqtyrýshy-keńesshilerdi jıi shaqyramyz. Sportshylarymyzdy jetistikterimen quttyqtaımyn jáne bolashaqta olarǵa budan da joǵary nátıjeler tileımin», dedi Mádenıet jáne sport vıse-mınıstri Sársen Quranbek.
Bıyl kadetter men jastar arasynda Beket Mahmutovty eske alýǵa arnalǵan dzıýdodan Azııa kýbogy altynshy márte ótkizildi. Jarysqa 2006-2007 jáne 2003-2005 jylǵy sportshylar qatysty.
