Resmı málimetterge súıensek, kúdikke ilingen qyzdardyń biri Oralhan Bókeı atyndaǵy №44 mektep-lıseıinde oqysa, endi biri qaladaǵy №5 mekteptiń oqýshysy. Al oqıǵa osydan bir aı buryn bolǵan eken. «Atalǵan oqıǵa 1-2 naýryz kúnderi bolǵan. Bul faktige qatysty Qylmystyq kodekstiń 293-babynyń 2-bóligi boıynsha О́skemen qalalyq Ertis polısııa bólimshesinde qylmystyq is tirkelip, sotqa deıingi tergeý júrgizilip jatyr. Tergeýge baılanysty ózge de málimetter jarııa etýge jatpaıdy», dep Shyǵys Qazaqstan oblysy PD baspasóz qyzmeti resmı málimet berdi.
Áleýmettik jelide taraǵan beıresmı jazbalarda shek joq. Keıbir pikirlerdiń aq-qarasyn anyqtaý úshin О́skemen qalalyq bilim bóliminiń basshysy Sáýle Alagózovamen jolyqqanbyz. Onyń aıtýynsha, áleýmettik jelide jazylǵandaı, kúdikke ilingen bir qyzdyń anasy bilim bóliminde qyzmet etkeni ras. Bolǵan oqıǵaǵa baılanysty ol jumystan shyǵarylǵany jáne shyndyq. Al ákesiniń sybaılas jemqorlyqqa qarsy is-qımyl salasynda qyzmet etedi degen pikirdiń jalǵan aqparat ekenin resmı organdar málimdegen.
– Tirkelgen derekke qatysty ispen quzyrly organdar aınalysyp jatyr. Bizdiń taraptan júrgizilip jatqan jumystardy aıta ketsem, ol mekteptegi oqýshylar mektepishilik qatań baqylaýda. Quqyq qorǵaý organdary sheshim shyǵarǵanǵa deıin oqýshylar áli mektepte, bilimderin alyp jatyr. Jalpy, qala boıynsha profılaktıkalyq jumystar kúsheıtildi. Ata-analarmen de kezdesýler ótkizdik, – deıdi S.Alagózova.
Bilim bólimi basshysynyń aıtýynsha, jurtty dúrliktirgen oqıǵaǵa №44, №5 mekteptiń jáne kolledj oqýshylarynyń qatystary bar. Oqýshy qyzdardyń biri buǵan deıin de buzaqylyq jasap, tirkeýge alynǵan eken. Al basqalarynyń ústinen osyǵan deıin aryz-shaǵym túspegen.
– Buzaqylyq jasaǵan oqýshymyzdyń ákesi memlekettik mekemelerdiń birinde kúzetshi, al anasy bizde kadr bóliminde qyzmet istegen. Qazir ol osy jaǵdaıǵa baılanysty qyzmetinen bosatyldy, – dep О́skemen qalalyq bilim bóliminiń basshysy Sáýle Baýyrjanqyzy ashyq aqparat berdi.
Qazirgi tańda kámelet jasqa tolmaǵan oqýshylarmen psıholog mamandar jumys júrgizip jatyr. Qylmystyq istiń sońy qalaı aıaqtalaryn sot sheshedi. Ázirshe oqýshylar bilimderin jalǵastyryp jatyr. Oralhan Bókeı atyndaǵy №44 mektep dırektory Jańyl Nazarbaevanyń sózinshe, buzaqylyq jasap, kúdikke ilingen qyz bala atalǵan mektepte 1-synyptan bastap oqıdy eken.
– Ol qyzymyz voleıbolǵa qatysady. Oqý úlgerimi jaqsy. Qalalyq, oblystyq saıystardan júldeli oryndar alǵan. Bul minezin birde-bir ret baıqamaǵan edik. Oqıǵany estı sala, mektepishilik esepke qoıdyq. Onymen áleýmettik pedagog, psıholog, tárbıe isiniń meńgerýshileri jumys istep jatyr. Al oqıǵa sabaqtan tys ýaqytta bolǵan. Qazir mundaı buzaqylyq oryn almaýy úshin profılaktıkalyq jumys júrgizilip jatyr. Dál qazir oqýdan shyǵaryp jibere almaımyz. 9-synyp bitirgen soń qoıa beremiz. Múmkin oǵan deıin sot sheshimi shyǵyp, jaǵdaı ózgere jatar. Eń bastysy, sot ádil sheshim shyǵarsyn, – deıdi №44 mekteptiń dırektory J.Nazarbaeva.
Shyǵys Qazaqstan oblysy
