Máselen, elimizde 1 mln 63 myńǵa jýyq adam fýtbol úıirmesine barady eken. Olardyń qatarynda atalǵan sportpen kásibı túrde aınalysatyn qyz-jigitter de bar. Bolashaq fýtbol juldyzdaryn jattyqtyryp, tárbıelep shyǵarý úshin búginde Qazaqstan boıynsha 17 myńǵa jýyq úıirme jumys isteıdi.
Keıingi jyldary Qazaqstanda komandalyq sport túrlerine degen qyzyǵýshylyqtyń artqany baıqalady. Buǵan elimizde 766 myńnan asa adam voleıbolmen, 562 myńǵa jýyǵy basketbolmen aınalysatyny dálel bola alady. Jalpy, voleıbol sportynan jasóspirimder men eresekterge arnalǵan 16 myńǵa jýyq úıirme, basketboldyń qyr-syryn úıretetin 11 738 úıirme bar.
Sonymen qatar sońǵy ýaqytta jastar arasynda jeńil atletıka men ústel tennısi oıyndary da keń tanymaldyqqa ıe bola bastaǵan. Atap aıtqanda, «Sport padıshasy» atanǵan jeńil atletıkamen 384 myńǵa jýyq otandasymyz shuǵyldanady. Elimiz boıynsha bul sport túrinen 7 380 úıirme jumys istep tur.
Al jas ereksheligi men fızıkalyq daıyndyǵyna qaramastan jalpyǵa birdeı qoljetimdi sport túri sanalatyn ústel tennısimen elimizde 242 myńnan asa adam aınalysady eken. Mınıstrliktiń deregi boıynsha, elimizde 8 myńǵa jýyq ústel tennısi úıirmesi bar. О́kinishke qaraı, elimizdiń sport jankúıerleri úshin nómiri birinshi sport túrine aınalǵan boks úıirmelerine nebári 126 myńǵa jýyq adam qatyssa, dzıýdomen 133 myń sportshy aınalysady. Al 116 myń adam erkin kúrespen shuǵyldanady.
