«Qazir kóptegen ǵylymı mekemeniń materıaldyq-tehnıkalyq jaǵdaıy máz emes. Tipti nashar deýge bolady. Ǵalymdardyń jalaqysy tómen. Sol sebepti keıbir daryndy ǵalymdarymyz sheteldiń ǵylymı ortalyqtarynda jumys istegisi keledi. Muny ashyq aıtýymyz kerek.
Sondyqtan negizgi ǵylymı-zertteý ınstıtýttaryn bıýdjetten tikeleı qarjylandyrý qajet. Olardyń ınfraqurylymy jańǵyrtylyp, zamanaýı zerthanalar salynýǵa tıis.
Ǵylymı zertteý ınstıtýttarynyń jumysy qanshalyqty tıimdi ekenine taldaý jasaý kerek. Jas ǵalymdar onda yqylaspen jumys isteýi úshin jaǵdaı jasaý qajet», dedi Qasym-Jomart Kemeluly.
Memleket basshysy ǵylym salasyn grant arqyly qarjylandyrý tásilin usyndy. Ári memlekettik satyp alý normalarynyń ǵylym sapasyna kedergi keltirip otyrǵanyn da atap ótti.
«Sondaı-aq ujymdyq zerthanalardyń áleýeti zor. Onda ártúrli ǵalymdar men ǵylymı ujymdar birlesip jumys isteı alady. Men ǵylymı ınfraqurylymdy grant arqyly qarjylandyrýdyń jańa tásilin engizý qajet dep sanaımyn. Sol arqyly alynǵan qural-jabdyqty paıdalaný quqyǵy basqa da ǵylymı mekemelerge berilýge tıis. Memlekettik satyp alýǵa qatysty normalar naqty jobalardy júzege asyrýǵa kedergi keltirip otyr. Munda da qaǵazbastylyq, bıýrokratııa bar. Bul jaǵdaı ǵylymı zertteýler men tájirıbelik-konstrýktorlyq jumystardyń merzimine jáne sapasyna kesirin tıgizedi. Memlekettik ǵylymı mekemelerge jáne joǵary oqý oryndaryna osy jumysty memlekettik satyp alý talaptarynan tys júrgizýge múmkindik berilýi qajet», dedi Prezıdent.
