Polsha quramasynyń kapıtany Davıd Selt bul kezdesýde Qazaqstan tennısshilerin favorıt dep sanasa da, shákirtteri tek jeńis úshin oınaıtynyn málimdedi. Sondaı-aq ol jerlesterimizdiń jeke sheberligine toqtalyp, Iga Shventek pen Magda Frehtiń joqtyǵyn aıtty.
«Erteń bizdi óte aýyr synaq kútip tur. Biraq qarsylastarymyzǵa laıyqty qarsylyq kórsetýge ýáde beremiz. О́kinishke qaraı, jaraqatyna baılanysty quramamyzdyń kóshbasshysy Iga Shventek bul jarysqa qatysa almaıdy. Jalpy, Qazaqstan quramasynyń tennısshilerin óte jaqsy bilemiz. Elena Rybakına bıyl óte tabysty óner kórsetip júr, sheberligi de ósip keledi. Maǵan onyń oıyny unaıdy. Iýlııa Pýtınseva – kúsh-jigeri myqty tennısshi, ásirese topyraq tósenishte jaqsy oınaıdy. Anna Danılına juptyq synda ótken jyly Aýstralııa chempıonatynyń fınalyna deıin jetkenin jaqsy bilemiz. Degenmen bul komandalyq jarys bolǵandyqtan, bári de bolýy múmkin», dedi Selt.
Al Iýlııa Pýtınseva topyraq tósenishtegi maýsymnyń bastalǵanyn aıtyp, qumdaýyt kortta oınaý oń jambasyna keletinin jetkizdi.
«Tósenishti tańdaǵan kezde bizge qaısysy kóbirek qolaıly, soǵan súıendik. Negizi qandaı tósenish, qandaı kort bolsa da, biz ár jarysqa tezirek beıimdelýge tyrysamyz. Dese de bizge qumdaýyt kortta oınaý yńǵaıly jáne oń jambasymyzǵa keledi dep te aıtsam bolatyn shyǵar. Byltyr dál osyndaı kortta Germanııa tennısshilerin tize búktirip, alǵash ret álem chempıonatynyń fınaldyq kezeńine joldama jeńip alǵan bolatynbyz. Bıyl da sol jetistigimizdi qaıtalaǵymyz keledi. Erteń jeńis úshin jáne jankúıerlerdi qýantý úshin bar kúsh-jigerimizdi salamyz», dedi Pýtınseva.
«El namysyn qorǵaý úlken jaýapkershilik júkteıdi. Aldyn ala jeńemiz dep boljam jasaý múmkin emes. Qarsylas komandanyń quramy qandaı bolatynyna qaramastan, tas-túıin daıyndalyp jatyrmyz. Eki jyl qatarynan elordada óner kórsetetinimizge qýanyshtymyz jáne ótken jylǵy nátıjeni qaıtalaǵymyz keledi. Qyzdardyń kóńil kúıi kóterińki, kortqa úırenip, oıyndarǵa daıyndalyp jatyr. Eń aldymen, tájirıbeli tennısshilerimizge senim artamyz. Eger úsh básekeniń qorytyndysy boıynsha másele erte sheshilip jatsa, onda jas tennısshilerdiń babyna qaraımyz», dedi Shvedova.
