Dın des berer emes
Shahmattan álem tájine úmitker qytaılyq Dın Lıjen barsha jankúıer men sarapshylardy tańǵaldyryp, tórtinshi partııada álem chempıonatyndaǵy alǵashqy jeńisine qol jetkizdi. Básekeni aǵylshyndyq júrispen bastaǵan Dın reseılik grossmeısterdi 47-júriske kelgende quryǵyna túsirip, tórt saǵatqa jalǵasqan matchta basym tústi.
Ekinshi partııada aq tastarmen oınap, qarsylasyna jol bergen Dın Lıjen bul joly qatelesken joq. Degenmen ol tórtinshi partııada da ádetinen jańylmaı, kóp ýaqytyn óz bólmesinde ótkizip, júris jasaý kezinde uzaq oılandy. Al Iаn Nepomnıashıı bolsa, ózine óte senimdi oınady.
Alǵashqy júristi jasaǵan Dın bul joly óziniń qalypty júrisinen bas tartyp, birinshi qadamyn c4 pen bastady. Al Nepomnıashıı buǵan Nf6 júrisimen jaýap qaıtardy. On birinshi qadamǵa deıin grossmeısterler kópshilik asa tańǵalatyndaı júris jasaǵan joq. О́ıtkeni ekeýi de rýmynııalyq shahmatshy, osy álem chempıonatyndaǵy qytaılyq shahmatshynyń sekýndanty Rıhard Rapport pen germanııalyq Ilıa Zaragaskııdiń 2013 jyly oınaǵan partııasynyń júrisin qaıtalaýmen boldy.
Al 28-júriske kelgende Iаn nebári eki mınýt qana oılanyp, Kd4 júrisin jasaǵanda, shahmat mamandary Nepomnıashııdiń óreskel qate jibergenin aıtty. Al 47-júristen keıin reseılik grossmeıster jeńilgenin moıyndamasqa amaly qalmady. Tórtinshi partııadan keıingi baspasóz máslıhatynda Dın: «Jeńiske jetkenime qýanyshtymyn. О́te qıyn match boldy, biraq oıyn tizginin óz qolymda ustap, mańyzdy jeńiske qol jetkizdim. 29-júrisimdi jasaǵannan keıin bul partııada jeńiske jetetinimdi bildim», dedi qytaılyq shahmatshy.
Al Iаn Nepomnıashıı matchtyń ádettegideı óte tartysty ótkenin aıtyp, 15-qadamnan keıin óz pozısııasyn durys baǵamdaı almaǵanyn moıyndady.
Iаnnyń oılastyrǵan qadamy
Ret boıynsha 5-partııany Iаn Nepomnıashıı aq tastarmen bastady. Ol birinshi partııadaǵydaı bul básekeni de ıspanııalyq júrispen ashyp berdi. Alǵashqy júristerdi qarsylastar tez-tez jasap, pozısııaǵa kirgende kóbirek oılana bastady. Ásirese, qara tastarmen oınaǵan qytaılyq shahmatshy ár júrisin óte uzaq oılanyp jasady. Al reseılik Nepomnıashıı tórtinshi týrda jeńilistiń kermek dámin tatsa da, besinshi partııada júristerin óte jyldam jasap otyrǵany barshany tańǵaldyrdy.
Qytaılyq grossmeıster besinshi partııa barysynda aıtarlyqtaı qatelikterge jol bergen joq, biraq ár júris saıyn pozısııasy nasharlaı bastaǵanyn ishteı sezip otyrdy. Al Iаn mundaı sátte ortalyq alańdy kúsheıtip, oıyndy óz baqylaýynda ustaýǵa tyrysty. Áıtse de, 30-júristen keıin Nepomnıashıı aıqyn basymdyqqa ıe bola bastady. Dın sońyna deıin qarsylyq kórsetýge tyrysqanymen, 48-júristen keıin óz jeńilisin moıyndady.
– Búkil match boıy qorǵanysta oınaý ońaı bolǵan joq. 29-júriste jasaǵan qateligim oıyn taǵdyryn sheship ketti desem de bolady. Osydan keıin meniń barlyq pozısııam álsirep qaldy, – dedi Dın Lıjen.
Al Nepomnıashıı alǵashqy júrister daıyndyq barysynda aldyn ala oılastyrylǵan qadamdar bolǵanyn jáne sonyń arqasynda match boıy birneshe sátti pozısııada oınaǵanyn aıtty.
Gazet bettelip jatqanda álem tájine úmitker shahmatshylar ózderiniń altynshy partııasyn oınap jatqan bolatyn. Al grossmeısterler búgin tórtinshi demalys kúnin tıimdi ótkizýge tyrysyp jatyr.
